Ni mu mukino w’Umunsi wa Gatandatu wo mu Itsinda rya Nile Conference rya Basketball Africa League, wabereye muri BK Arena mu ijoro ryo kuri iki Cyumweru, tariki ya 25 Gicurasi 2025.

Uyu mukino watangiye ushyushye amakipe yombi atsindana, agace ka mbere karangira Nairobi City Thunder iyoboye umukino n’amanota 19 kuri 17 ya APR BBC.

Iyi kipe yo muri Kenya, yakomeje gukina neza no mu ntangiriro z’agace ka kabiri ndetse izamura ikinyuranyo kigera mu manota 10 (29-19).

Uyu mukino wakomeje kugora Ikipe y’Ingabo cyane cyane mu bwugarizi bwari bwananiwe guhagarika Albert Odero.

Ku rundi ruhande, abakinnyi b’Ikipe y’Ingabo bakoraga amakosa menshi kuko nka Chasson Randle, Obadiah Noel, na Miller Dime Jr bari bafite abiri.

Nairobi City Thunder yazamuye ikinyuranyo, igice cya mbere cyarangiye iyoboye umukino n’amanota 45 kuri 35 ya APR BBC.

Ikipe y’Ingabo yagiye mu gace ka gatatu igabanya ikinyuranyo ibifashijwemo na Aliou Diarra na Youssoupha Ndoye.

Ntibyarambye kuko mu minota ya nyuma y’aka gace, iyi kipe yo muri Kenya yongeye gutsinda cyane, igasoza iyoboye n’amanota 61 kuri 55 ya APR BBC.

Ikipe y’Ingabo yasubiranye imbaraga zikomeye mu gace ka nyuma, Axel Mpoyo utari wagaragaye atsinda amanota menshi yiganjemo atatu, mu gihe n’umurindi w’abafana wari hejuru cyane.

Ubwo haburaga iminota ine ngo umukino urangire, Mpoyo yatsinze amanota abiri yatumye amakipe yombi anganya amanota 68-68.

Amanota atatu yo ku isegendo rya nyuma ya Obadiah Noel, yafashije APR BBC gutsinda Nairobi City Thunder amanota 77-74 ibona itike y’Imikino ya Nyuma ya BAL 2025 izabera muri Afurika y’Epfo.

Ikipe y’Ingabo yatsinze imikino itatu muri iri rushanwa, yazamutse ari iya kabiri inyuma ya Al Ahli Tripoli.

Perezida Kagame n'umwuzukuru we bakurikiye umukino wahesheje APR BBC itike itike y'imikino ya nyuma ya BAL

Umukino wa APR BBC na Nairobi City Thunder wari injyanamuntu

APR BBC yagerageje kwifashisha intwaro zayo zose

Kivumbi King yataramiye abitabiriye umukino

Garang Diing wa Nairobi City Thunder yagoye APR BBC

Obadiah Noel yatsinze amanota atatu yagejeje APR BBC ku ntsinzi

Abafana baryohewe n'umukino bikomeye

Aliou Diarra ahanganye n'umukinnyi wa Nairobi City Thunder

Umurindi w'abafana wagaruye APR BBC mu mukino

Aliou Diarra yafashije APR BBC bikomeye

Umuyobozi wa APR BBC, Richard Murefu, yishimiye intsinzi bidasanzwe

Adonis utarakinnye iyi mikino kubera imvune ari mu banezerewe bidasanzwe

Amafoto: Rusa Prince & Munyemana Isaac