Kuri uyu wa Kane, tariki ya 26 Gashyantare 2026, ni bwo ubuyobozi bwa BAL bwashyize hanze uko amakipe agabanyije muri iri rushanwa rihuza amakipe akomeye muri Basketball muri Afurika.

Muri uyu mwaka w’imikino, amakipe 12 ni yo azakina imikino 15 kuri buri imwe, dore ko azaba agabanyijwe mu matsinda abiri buri rimwe ririmo amakipe atandatu, bitandukanye no mu mwaka ushize ubwo ryakinwe mu matsinda atatu.

Itsinda rya Kalahari Conference rizakinwamo na Johannesburg Giants yo muri Afurika y’Epfo ari na ho hazabera irushanwa, Al Ahly Tripoli yo muri Libya, APR yo mu Rwanda, Dar City yo muri Tanzania, Nairobi City Thunder yo muri Kenya na Petro de Luanda yo muri Angola.

Itsinda rya Sahara Conference ririmo Fath Union Sport Rabat yo muri Maroc ahazabera irushanwa, Al Ahly yo mu Misiri, ASC Ville de Dakar yo muri Sénégal, Club Africain yo muri Tunisia, JCA Kings yo muri Côte d’Ivoire na Maktown Flyers yo muri Nigeria.

Imikino izahera muri Kalahari Conference izakinirwa mu Mujyi wa Pretoria kuva tariki ya 27 Werurwe kugeza tariki ya 5 Mata 2026, mu gihe irya Sahara Conference rizakinira i Rabat kuva tariki ya 24 Mata kugeza tariki ya 3 Gicurasi 2026.

Amakipe ane azitwara neza muri buri tsinda, azahurira i Kigali mu Rwanda, aho azakinira imikino ya kamarampaka n’iya nyuma. Iyi izaba kuva tariki ya 22 kugeza 31 Gicurasi 2026.

Iri ni rimwe mu marushanwa ya Basketball akurikirwa n’abatari bake ku Isi, dore ko mu mwaka ushize wa 2025 ubwo ryegukanwaga na Al Ahli Tripoli, ryakurikiwe n’abarenga ibihumbi 140, baturutse mu bihugu 214, abagera kuri miliyari 1,2 barikurikiranye ku mbuga nkoranyambaga zitandukanye.

APR BBC yamenye amakipe izahangana na yo muri Kalahari Conference