00:00:00 IGIHE NETWORK KN KINYARWANDA EN ENGLISH FR FRANCAIS

Basketball: Abakinnyi bahanzwe amaso mu mikino ya nyuma ya Playoffs

Yanditswe na Byiringiro Osée Elvis
Kuya 7 Nzeri 2022 saa 05:18
Yasuwe :

Imikino ya nyuma ya kamparamaka (Playoffs) mu mwaka w’imikino 2022/23 iratangira kuri uyu wa Gatatu tariki 7 Nzeri 2022, Patriots na REG BBC zicakirana ku nshuro ya gatanu yikurikiranya.

Ni imikino izakinwa mu buryo bw’umwiza muri itanu (Best of five), bivuze ko ikipe izatsinda imikino itatu muri itanu ari yo izatwara igikombe cya shampiyona.

Mu rwego rwo kwitegura iyi mikino, amakipe yombi yakoze ku mukinnyi mwiza wese washobokaga kugira ngo azayifashe kwitwara neza. Muri iyi nkuru tugiye kugaruka ku bakinnyi bo kwitega ku mpande zombi.

Ku ruhande rwa REG BBC ifite igikombe giheruka, yageze ku mukino wa nyuma bigoranye kuko byasabye gutsinda APR BBC imikino itatu kuri ibiri.

REG BBC yagaruye Abanyamerika Cleveland Thomas Junior na Adonis Filer bayifashije kugera muri ¼ mu mikino ya Basketball Africa League (BAL).

Cleveland Thomas Junior

Ni Umunyamerika w’imyaka 28, ni umwe mu bahanzwe amaso kuko usibye kuba azi kugumana umupira no kuwutanga neza, uyu musore azi gutsinda cyane kuko abarirwa amanota 19 ku mukino.

Yibukirwa cyane mu mikino ya BAL ubwo REG BBC yatsindaga AS Sale amanota 91-87, uyu musore yatsinzemo amanota 26.

Adonis Filer

Ni Umunyamerika w’imyaka 29, ukina wihuta cyane akarindwa mubi mu gutsinda amanota atatu. Ubufatanye bwe na Cleverand bwitezweho gutanga akazi gakomeye ku ikipe ya Patriots BBC igomba gushaka igisubizo cy’aba basore.

Nshobozwabyosenumukiza Jean Jacques Wilson

Azwiho gufasha cyane mu bwugarizi no gutanga imipira ivamo amanota.

Uyu musore abarirwa ‘defensive Rebound’ eshatu mu mukino n’imipira itatu ivamo amanota, akanabarirwa gutsinda amanota 14 ku mukino.

Aba bose kandi biyongeraho Pitchou Manga, Alex Mpoyo, Shyaka Olivier na kapiteni wa REG BBC Kaje Elie.

Ku rundi ruhande ikipe ya Patriots nayo yariteguye bikomeye cyane. Iyi kipe yageze ku mukino wa nyuma biyoroheye nyuma yo gutsinda Tigers BBC imikino ibiri ku busa.

Chris Crawford

Ni Umunyamerika w’imyaka 30, areshya na metero 1.93 bikamufasha kuba mwiza mu busatirizi n’ubwugarizi.

Uyu musore Patriots yamukuye muri Seydou Legacy Athlétique Club (SLAC) yo muri Guinée.

Mu mikino ya BAL ari nayo uyu musore yigaragarijemo ubwo ikipe ye ya SLAC yatsindaga DUC, yatsinze amanota 30 muri 85-70 yatsindiyeho uwo mukino.

Chris ni umukinnyi wo kwitega cyane muri iyi mikino.

Kendall Gray

Ni Umunyamerika ukinira Ikipe y’Igihugu y’u Rwanda wafashije Patriots kugera ku mukino wa nyuma, ahanini kubera kumenya kugarira cyane no kugarura amanota yagombaga kujya mu nkangara.

Ntore Habimana

Ntore ni Umunyarwanda w’imyaka 25 wavukiye muri Canada, akaba ari umwe mu bakinnyi batanga icyizere muri Basketball y’u Rwanda.

Uyu musore nawe yitezweho kugira icyo afasha Patriots cyane ko uburyo bwe bw’imikinire bugoye cyane kubera gucenga cyane kandi yihuta ibintu bigora abo bahanganye.

Mu mukino wo kwishyura muri iyi shampiyona, Ntore yatowe nk’umukinnyi w’umukino (MVP), kuko yafashije Patriots gutsinda REG BBC ubwo yatsindaga amanota 18.

Gasana Kenneth

Ubunararibonye, ubuyobozi mu kibuga, gutsinda amanota atatu menshi ni bimwe mu bigira Gasana umukinnyi wo kwitega muri iyi mikino.

Gasana ntago atsinda amanota menshi ariko uburyo bwo gukinisha no gutwara ikipe nibyo bimugira umukinnyi wo kutarenzwa ingohe.

Uretse aba bakinnyi Patriots ifite n’abandi basore bo kwitega cyane nka Bush Wamukota, Mugabe Aristide, Sagamba Sedar n’abandi.

Ni ubwo Patriots yatsinze imikino ibiri yose yabahuje na REG uyu mwaka, biragoye kugira iyo uha amahirwe kuko aba ari umukino w’ishiraniro kandi w’abasore b’abahanga.

Uyu mwaka ikipe izatwara igikombe niyo izahagararira u Rwanda mu mikino ya BAL 2023 izabera mu Rwanda ku nshuro ya gatatu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .