00:00:00 IGIHE NETWORK KN KINYARWANDA EN ENGLISH FR FRANCAIS

Basketball: Imikino ya Playoffs yari kuzabera muri BK Arena yimuriwe ibibuga

Yanditswe na Iradukunda Olivier
Kuya 25 Kanama 2022 saa 07:36
Yasuwe :

Imikino ya nyuma muri Basketball yari kuzabera muri BK Arena, yimuriwe ku bindi bibuga kubera imikino ya Africa Handball Championship y’abatarengeje imyaka 20 na 18 iri kuhabera.

Iyi mikino izaba tariki ya 26 Kanama 2022. Imikino yo kuri uyu wa Gatanu izakinirwa ku kibuga cya Kepler University ndetse no ku kibuga cya AIPER Nyandungu.

REG Basketball Club na APR Basketball Club bazakinira kuri Kepler, guhera saa mbiri z’ijoro naho Patriots Basketball Club na Tigers Basketball Club bakinire ku kibuga cya AIPER Nyandungu, guhera saa mbiri z’ijoro.

Indi mikino nayo iteganyijwe kuri ibyo bibuga ni imikino ya nyuma mu bagore, nayo izahuza REG Women BBC na The Hoops Rwanda mu gihe undi mukino uzahuza ikipe ya APR Women BBC na RP IPRC Huye.

Aya makipe yose azakina imikino ya nyuma yo gutanguranwa gutsinda imikino ibiri mu mikino itatu bagenewe muri playoffs za kimwe cya kabiri cy’irangiza. Iyi mikino yose izaba hagati ya tariki ya 26 na 31 Kanama 2022, ku bibuga bishya byatangajwe.

Amakipe abiri azatsinda izo playoffs zo muri kimwe cya kabiri, azahurira mu mukino wa nyuma. Amakipe azakina umukino wa nyuma, azakina imikino itanu, bityo izatsinda imikino itatu mbere y’indi yegukane igikombe.

Ikipe ya Patriots Basketball Club irahabwa amahirwe yo gusezerera Tigers Basketball Club ikagera ku mukino wa nyuma ariko ku ruhande rwa REG Basketball Club na APR Basketball Club biracyari ingorabahizi kuko aya makipe yombi yagaragaje gukomera mu mikino ya shampiyona iri kugera ku musozo.

Imikino ya nyuma ya playoffs yo izabera muri BK Arena i Remera kuko Amarushanwa ya Handball azaba yageze ku musozo, hagati ya tariki 7 na 16 Nzeri 2022.

Ikipe izegukana igikombe cya nyuma muri playoffs izaba ibonye itike yo guhagararira u Rwanda mu gushakisha itike yo kuzaseruka muri Basketball Africa League 2023, izabera hano mu Rwanda.

Imikino ya nyuma muri Basketball yari kuzabera muri BK Arena yimuriwe ibibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .