00:00:00 IGIHE NETWORK KN KINYARWANDA EN ENGLISH FR FRANCAIS

Bronny James yateye ikirenge mu cya se, asinya amasezerano na Nike ku myaka 18

Yanditswe na Iradukunda Olivier
Kuya 11 Ukwakira 2022 saa 10:53
Yasuwe :

Umuhungu wa LeBron James ugaragaza ko ari impano idasanzwe ku hazaza ha NBA, Bronny James yatangiye guca amarenga ko azandika amateka nk’ayo se yakoze muri Basketball.

Bronny James w’imyaka 18 kuri ubu yasinye amasezerano yo kumenyekanisha ibikorwa by’Uruganda rwa Nike.

Aya masezerano arimo gukoresha isura ye, amazina ye n’ibigwi bye nk’uko abakinnyi bakina muri iki cyiciro cy’amashuri babyemerewe. Ishyirahamwe ry’Imikino yo mu Mashuri ‘NCAA’ ryashyize hanze iri tegeko tariki ya 1 Nyakanga 2021.

Nike, Ikigo gifite izina ritari rito mu bucuruzi bw’ibikoresho bya siporo cyatangaje ko kiri kubaka gahunda yo kumenyekanisha ibikorwa byacyo mu bakiri bato.

Iyi gahunda rero yatangiriye kuri Bronny James na bagenzi batarinjira muri NBA ariko bakina shampiyona z’ibigo by’amashuri.

Nyuma yo gusinya aya masezerano, Bronny James, yavuze ko impamvu nyamukuru yatumye yemera kuyashyiraho umukono, ashingira ku kuba yarafashije se ndetse bikanagira ingaruka nziza ku muryango wabo.

Yagize ati “Niba nibuka neza, Nike ni umwe mu muryango wacu. Kubona amahirwe yo gukorana na yo ntako bisa. Gukorana na yo ni ikimenyetso cyo kuba bakomeje kuba hafi umuryango wacu. Aya masezerano avuze byinshi ku buzima bwanjye.”

Mu 2003, ni bwo Lebron James ubyara Bronny James na we yasinye amasezerano y’imikoranire n’uru ruganda rwa Nike, icyo gihe na we yari afite imyaka 18. Aha ni mbere y’uko asinya amasezerano azamara ubuzima bwe bwose, ya miliyari imwe yo gukorana n’uru ruganda kuva mu 2015.

Bronny James ntabwo ari yo masezerano ya mbere akomeye asinye mu buzima bwe, kuko muri Gashyantare uyu mwaka, yasinye ayo kumenyekanisha imyenda y’imbere y’Uruganda PSD.

Kugeza ubu, uyu muhungu mukuru wa LeBron James akinira Ikipe ya Sierra Canyon High School yo muri Los Angeles.

LeBron Raymone James Sr. uzwi ku izina rya "King James", kuri ubu akinira Los Angeles Lakers. Uyu mukinnyi w’imyaka 37 afatwa nk’umwe mu b’ibihe byose muri Shampiyona ya Baskteball muri Amerika, NBA.

Bronny James avuga ko ashaka gukora cyane kugira ngo atange umusanzu we mu ikipe y’ikigo cye mbere yo kwerekeza muri NBA.

Mu bandi bana Nike yasinyishije harimo Caitlin Clark, DJ Wagner, Haley Jones na JuJu Watkins bakina mu mashuri yisumbuye. Muri aba bana kandi harimo DJ Wagner, umuhungu wa DeJuan wakinanye na LeBron James muri Cleveland Cavaliers.

Bronny James yasinye amasezerano y'imikoranire na Nike
Bronny James yatangiye gutera ikirenge mu cya se LeBron Raymone James Sr. ukinira Los Angeles Lakers

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .