Espoir Basketball Club yongeye kwegukana igikombe cya shampiyona nyuma yo gutsinda Rusizi ku manota 83 kuri 37. Espoir irangije shampiyona idatsinzwe umukino n’umwe, yisubiza igikombe yari yatwaye mu 2012.

Ikipe ya Espoir yatsinze imikino 12 yose ya shampiyona ya 2013. Hari imwe mu mikino yatsinze igejeje ku manota 100, ubwo yihereranaga UGB ikayitsinda amanota 102 kuri 58.

Umukino bakinnye na KBC bakayitsinda ku manota 72-64, ikinyuranyo cy’amanota 8 ni wo umwe mu mikino batsinze ku kinyuranyo gito.

N’ubwo Espoir yatwaye igikombe cya shampiyona, nta bindi bihembo nk’amafaranga izabona, kuko shampiyona kugeza ubu nta muterankunga ifite.

Espoir ni yo izahagararira u Rwanda mu mikino y’akarere ka 5.

Undi mukino wabaye mu mpera z’iki cyumweru, UGB yatsinze CSK ku manota 76-65.

N’ubwo shampiyona ya Basketball irangiye, imikino ibiri yo 30Plus yari yatewemo mpaga na KBC na APR izasubirwamo.

Imikino ya Play Offs ishobora kuba tariki ya 26 Ukwakira 2013. Mu 2012, Espoir BBC yari yatwaye ibi bikombe byombi.

[email protected]