Nk’uko bigaragara mu ibaruwa yandikiwe amakipe bakinira, abakinnyi bahanwe ni Kazeneza Emile Galois wa Espoir BBC, Boissy Jean Jacques wa UGB BBC ndetse na Kaje Elie na Ikishatse Hervé bombi bakinira REG BBC.
Mu mikino wabaye ku wa Gatanu ushize, tariki ya 19 Mata, REG BBC igatsinda Espoir BBC amanota 75-57, mbere gato y’uko agace ka kabiri karangira, habaye guhangana gukomeye ku bakinnyi b’impande zombi, aho ku ikosa Habineza Shaffi yakoreye Kaje Elie, undi yahise amuhindukirana ashaka kumukubita, kapiteni wa Espoir BBC, Kazeneza Emile aje kubahagararamo hagati na we Kaje amufata mu ijosi.
Izi mvururu zamaze iminota isaga ibiri, abasifuzi bafata umwanzuro wo gukura mu kibuga Kaje Elie, kapiteni wa Espoir BBC Kazeneza Emile Galois na Ikishatse Hervé winjiye mu kibuga avuye ku ntebe y’abasimbura ba REG BBC ubwo habaga imirwano.
FERWABA yahannye aba bakinnyi, aho kapiteni wa Espoir BBC, Kazeneza na Ikishatse wa REG BBC, bombi bahanishijwe gusiba umukino umwe, bakanishyura amande y’ibihumbi 50 Frw mu gihe Kaje wa REG BBC we yahanishijwe gusiba imikino ibiri no kwishyura amande y’ibihumbi 100 Frw.
Undi mukinnyi wahanwe ni Boissy Jean Jacques wa UGB BBC, na we wagaragaje imyitwarire itari myiza ku mukino ikipe ye yatsinzwemo na APR BBC amanota 70-63 kuri uwo Gatanu. Boissy, na we yahanishijwe gusiba umukino umwe no kwishyura amande y’ibihumbi 50 Frw.
Shampiyona ya Basketball iterwa inkunga na Banki ya Kigali irakomeza mu mpera z’iki cyumweru hakinwa umunsi wa 11, uwa 12 n’uwa 13 mu bagabo ndetse n’uwa karindwi n’uwa munani mu bagore.
Imikino ibiri iteganyijwe kuri uyu wa Gatanu, harimo uhuza UGB BBC na Patirots BBC yamaze gusubirana umwanya wa mbere mu gihe APR BBC na IPRC Kigali BBC zihurira mu mukino utangira saa 20:00.
Patriots BBC iyoboye urutonde rw’agateganyo n’amanota 24 mu mikino 13, REG BBC iri ku mwanya wa kabiri n’amanota 23 mu mikino 12 mu gihe Espoir BBC ifite amanota 18 ku mwanya wa gatatu imaze gukina imikino 11.
Gahunda y’imikino ya BK Basketball National League mu mpera z’iki cyumweru
Mu bagabo
– Ku wa Gatanu tariki ya 26 Mata 2019 (Umunsi wa 11)
– 18:00 : UGB BBC vs Patriots BBBC (Petit Stade)
– 20:00 : APR BBC vs RP-IPRC Kigali BBC (Petit Stade)
Ku wa Gatandatu tariki ya 27 Mata 2019 (Umunsi wa 12)
– 13:00 : REG BBC vs Rusizi BBC (Petit Stade)
– 14:00 : UR Huye BBC vs Espoir BBC (UR Huye)
Ku Cyumweru tariki ya 28 Mata 2019 (Umunsi wa 13)
– 09:00 : APR BBC vs Rusizi BBC (Petit Stade)
– 11:00 : RP-IPRC Huye BBC vs Espoir BBC (IPRC Huye)
Mu bagore
– Ku wa Gatandatu tariki ya 27 Mata 2019 (Umunsi wa karindwi)
– 11:00 : Marie Reine BBC vs RP-IPRC Huye BBC (Musanze)
Ku Cyumweru tariki ya 28 Mata 2019 (Umunsi wa munani)
– 11:00 : Ubumwe BBC vs APR WBBC (Petit Stade)
– 11:00 : Marie Reine BBC vs UR Huye WBBC (Musanze)
TANGA IGITEKEREZO