Shampiyona ya Leta Zunze Ubumwe za Amerika ya Basketball (NBA) ikomeje gushaka impano z’abakinnyi b’uyu mukino mu bice bitandukanye by’Isi, binyuze mu gutangiza shampiyona z’abana batarengeje imyaka 15.

U Rwanda rwabaye igihugu cya 12 muri Afurika NBA itangijemo shampiyona y’abato muri uyu mwaka, nyuma ya Cameroun, Côte d’Ivoire, Nigeria, Kenya, Maroc, Mozambique, Nigeria, Sénégal, Afurikay’Epfo, Tanzania na Uganda.

Iyi shampiyona y’abana yatangiye muri Gicurasi ihuza amakipe y’amashuri 30 y’abakobwa na 30 y’abahungu, batangira bakina mu gice cy’Iburengerazuba (Western Conferences) n’icy’Iburasirazuba (Eastern Conferences).

Junior NBA Rwanda League yasojwe kuri uyu wa Gatandatu hakinwa imikino ibiri; mu bakobwa umukino wa nyuma uguza Collège ADEGI Gituza na ISF Nyamasheke naho mu bahungu umukino wa nyuma uhuza Green Hills Academy na SonRise High School ry’i Musanze.

Mu bakobwa igikombe cyegukanywe na ADEGI Gituza yatsinze ISF Nyamasheke amanota 50-40 mu mukino wihariwe na ADEGI kubera ubuhanga bw’abakinnyi bayo barimo Nyiramugisha Hope, umukobwa w’imyaka 15 watsinze amanota 21 muri uyu mukino, binamuhesha kuba umukinnyi wahize abandi bakobwa muri iri rushanwa.

Mu bahungu igikombe cyegukanywe na Green Hills Academy yatsinze SonRise High School amanota 52-28, harimo amanota 19 yatsinzwe n’umukinnyi umwe, Sano Rutatika Dick w’imyaka 14, wakinnye iri rushanwa akubutse mu igeragezwa muri Sénégal.
Uyu Sano yari mu bana 24 batoranyijwe muri Afurika yose ngo batoranywemo abazajya muri NBA Academy yo muri Leta Zunze Ubumwe za Amerika.

Biteganyijwe ko nyuma yo kwitwara neza muri iyi mikino, Sano Rutatika Dick azafata indege imwerekeza muri Kaminuza ya Alabama y’Amajyepfo, aho yatsindiye umwanya wo kwiga anakina Basketball.

Mu marira menshi, asezera kuri bagenzi be biganye muri Green Hills Academy, Sano yemeje ko yifuza gukora cyane akaba umukinnyi wa mbere w’umunyarwanda unakinira u Rwanda ukinnye muri NBA, shampiyona ya mbere ikomeye ku Isi.

Ati "Ntabwo byoroshye ariko mfite icyizere cyo kuzagera kure hashoboka kuko ndacyari muto. Ndashimira buri umwe wagize uruhare ngo ngere kuri uru rwego, abayobozi b’ishuri ryanjye, abatoza bantoje na bagenzi banjye dukinana. Ndifuza kubahesha ishema mba umunyarwanda wa mbere ukinnye muri NBA."

Iyi mikino yabereye kuri Petit Stade Amahoro yitabiriwe n’abayobozi barimo abashinzwe imikino mu Rwanda n’abandi nk’umuyobozi wa NBA Africa, Amadou Gallo Fall.

Iyi mikino yasusurukijwe n'itsinda ry'abakina Freestyle Basketball Dunks ryavuye muri USA

Abakinnyi bagize umwanya wo kwerekana impano zabo mu gushyira umupira mu gakangara

Abantu benshi bari bahanze amaso ubuhanga bwerekanwaga muri Basketball

Abakinnyi ba SonRise School yambaye ubururu ntabwo bari bafite igihagararo gikanganye

Abakinnyi batwaye ibikombe banahawe impeta z'ishimwe na NBA

Abakinnyi b'ikipe y'igihugu y'u Rwanda bakina muri Leta zunze ubumwe za Amerika, Manzi Dan Sorozo na Rwabigwi Adonis bari baje kureba barumuna babo

Abana ba SonRise School byabasabaga gusimbuka cyane ariko uburebure bw'abana ba Green Hills bwaboroherezaga akazi bakabahagarika

Abeza kurusha abandi bazabona amahirwe yo gushakirwa amashuri hanze y'u Rwanda, yateza imbere impano yabo

Abitabiriye iyi mikino bari baryohewe

Imikino yasojwe n'umuhanzi Bruce Melody washimishije abayitabiriye

Petit Stade yari yuzuye abafana

Byari ibyishimo bisendereye ku begukanye ibikombe

Ibi bigo by'amashuri byari byazanye n'abafana benshi

Abafana ba Green Hills bari benshi cyane ko iri shuri ribarizwa mu Muji wa Kigali

DJ Makeda Mahadeo n'umugabo we nabo bari bahari

Byari ibirori bidasanzwe

Bashimishije abafana nubwo bakiri bato

ADEGI Gituza niyo yegukanye igikombe mu bakobwa

Umuyobozi wa NBA Africa Amadou Gallo Fall ashyikiriza igikombe Green Hills

Wari umukino unogeye ijisho

ISF Nyamasheke yabaye iya kabiri mu bakobwa

ISF Nyamasheke (yambaye umweru) yari ifite abana bakinisha imbaraga ariko gutsinda umukino biranga

Itsinda 'Active' bari mu basusurukije abitabiriye iyi mikino mu ndirimbo zabo zitandukanye

Junior NBA Rwanda League 2018 yasojwe mu Rwanda

Mu marira menshi, Sano yasezeye kuri bagenzi be

Nyuma yo guhesha ishuri rye intsinzi, Sano Rutatika Dick agiye guhita yerekeza muri University of South Alabama

Perezida wa FERWABA Mugwiza aganira n'umuyobozi wa NBA Africa, Amadou Gallo Fall wari kumwe n'Umunyamabanga muri MINISPOC Ntigengwa John

Sano Rutatika Dick (ufite umupira) yagoye cyane abana ba SonRise School

Munyabagisha Valens uyobora Komite Olempiki mu Rwanda ari mu bakurikiranye iyi mikino

SonRise School yabaye iya kabiri mu bahungu