Uyu mukino wabaye mu rukerera rwo kuri uyu wa Gatanu, watangiye amakipe yombi acungana bikomeye, agace ka mbere karangira Cavaliers iri imbere n’amanota 30-29, mu ka kabiri Warriors isoza imbere n’amanota 27-26 bivuze ko bagiye kuruhuka banganya amanota 57-57.
Nyuma yo kuruhuka, abasore nka Kevin Durant watsinze amanota 26 muri uyu mukino, Draymond Green watsinze amanota 13 agatanga imipira icyenda ivamo amanota, Stephen Curry watsinze amanota 29 na bagenzi babo barushije Cavaliers agace ka gatatu bagatsinda ku manota 28 kuri 22 bashyiramo ikinyuranyo cy’amanota atandatu muri rusange.
Agace ka kane kazanye impinduka Cavaliers nayo irakiharira ibifashijwemo na kabuhariwe wayo, LeBron James watsinze amanota 51 agatanga imipira umunani ivamo amanota muri uyu mukino, Kevin Love watsinze amanota 21, ikarangiza iri imbere n’amanota 29-23 bituma ku giteranyo muri rusange zinganya amanota 107-107.
Byabaye ngombwa ko hitabazwa iminota y’inyongera yiharirwa na Warriors igatsinda ku manota 17-07 ihita inegukana umukino wa mbere ku manota 124-114.
Warriors iramutse ibashije gutsinda imikino yindi itatu ikurikirana yahita yegukana igikombe ariko Cavaliers nigira uwo itsinda muri iyo ine igenwa n’amategeko hazagenda hongerwaho undi kugera habonetse ikipe imwe itsinda imikino ine.
Umukino wa mbere wakiriwe na Warriors ikaba ari nayo izakira uwa kabiri tariki 4 Kamena, indi ibiri ikurikira izabere The Q mu mujyi wa Ohio ku kibuga cya Cavaliers tariki 7 na tariki 9 Kamena mu gihe nihakenerwa ko hitabazwa indi mikino y’inyongera, Warriors izakira uwa gatanu tariki 12 kamena, tariki 15 Kamena bakinire kwa Cavaliers mu mukino wa gatandatu naho uwa karindwi ari nawo wa nyuma ube tariki 18 Kamena.
TANGA IGITEKEREZO