Cavaliers yatakaje igikombe cya shampiyona umwaka ushize itsinzwe na Golden State Warriors imikino 4-1, yashakaga kwihorera uyu mwaka ikacyegukana gusa mu mikino ibiri ya mbere yose yarushijwe na mukeba.
Nyuma yo gutsindwa umukino wa mbere ku manota 124 kuri 114, mu cyumweru gishize, mu rukerera rwo kuri uyu wa Mbere tariki 4 Kamena 2018, Cavaliers yongeye gutsindwa ku manota 122 kuri 103.
Kuva mu gace ka mbere k’uyu mukino, Warriors yari iri hejuru igatsinda ku manota 32 kuri 28, aka kabiri igatsinda ku manota 27 kuri 18 naho aka gatatu Cavaliers yihagararaho ikegukana ku manota 34 kuri 31 umukino ugeze mu gace ka nyuma, Warriors yongeye kurusha cyane Cavaliers igatsinda ku manota 32 kuri 23.
Muri uyu mukino Stephen Curry wa Warriors niwe watsinze amanota menshi (33) atanga n’imipira umunani ivamo amanota, Kevin Durant bakinana atsinda amanota 26 naho Klay Thompson atsinda 20 mu gihe ku ruhande rwa Cavaliers, LeBron James yatsinze 29 atanga imipira 13 ivamo amanota akurikirwa na Kevin Love watsinze amanota 22.
Warriors iramutse ibashije gutsinda indi mikino ibiri itaha izabere The Q mu mujyi wa Ohio ku kibuga cya Cavaliers tariki 7 na tariki 9 Kamena, yahita yegukana igikombe ariko Cavaliers nigira uwo itsinda muri iyo ibiri igenwa n’amategeko, hazagenda hongerwaho undi kugera habonetse ikipe imwe itsinda imikino ine.
Mu 2016 nibwo Cleveland iheruka kwegukana igikombe cya NBA, cyari icya mbere mu myaka 50 yari ishize. Icyo gihe nabwo yari yakinnye na Warriors ku mukino wa nyuma itsindwa imikino itatu ibanza ariko iza gukora amateka yo kuba ariyo kipe mu mateka ya NBA yegukanye igikombe yaratsinzwe imikino itatu yo ifite umwe; byagera ku wa karindwi ikacyegukana.
TANGA IGITEKEREZO