Kobe Bryant, wabazwe ku wa gatandatu w’icyumweru dusoje, amaze kuvunika agatsinsino k’ukuguru kw’ibumoso ashobora kugaruka mu mikino nyuma y’amezi atandatu ubwo Saison ya NBA izaba itangiye. N’ubwo bimeze bityo ngo nta gahunda ya vuba afite yo guhagarika umwuga we.

Kobe w’imyaka 34 y’amavuko ufatwa nk’akamana mu ikipe ya Lakers ya Los Angeles, azamara igihe kiri hagati y’amezi atandatu n’icyenda atagaragara mu mikino, nk’uko bitangazwa n’umukurikirana Gary Vitti.

Uyu mukinnyi w’ikirangirire mu mikino ya NBA, ngo ntibyoroshye kuzongera kumubona mu mikino kuko na we yabyivugiye.

Mu ijoro ryo ku wa Gatanu mu butumwa yatanze kuri facebook yibazaga uburyo ku myaka 35 y’amavuko azasubira ku rugero rwiza yari agezeho, hamwe n’imvune imeze ityo yahuye na yo. Yagize ati “Birashoboka ko ntsinzwe, ariko oya! Umunsi umwe nzahindura umwuga, ariko si none.” Ibi yabivuze ashaka kwerekana ko adafite gahunda yo guhindura umwuga we vuba aha.

7 sur 7 yatangaje iyi nkuru ivuga ko Bryant yakomeretse ku wa Gatanu avunika agatsinsino iminota itatu mbere y’uko umukino Lakers yatsinze Golden State urangira, ku manota 118 ya Lakers na 116 ya Golden State.

Bamwe mu batanze ubutumwa ku mbuga nkoranyambaga bagaragaje ko bababajwe n’impanuka ya Kobe Bryant. Uwitwa James kuri twitter yagize ati “Mbabajwe na Kobe Bryant wigaragaje mu marushanwa ya NBA inshuro zigera kuri eshanu, akaba mu myaka 34 y’amavuko ye 17 ayimaze akinira ikipe ya Lakers.”

Nk’uko bitangazwa n’umuyobozi mukuru mu ikipe ya Lakers, Mitch Kupchak, Bryant amaze kuvunika ntibyamubujije kongera gukina arwanira ishyaka ikipe ye, kandi n’ubusanzwe iyo avanwe mu kibuga ntareka kugira amashyushyu yo gusubiramo.

Bryant yabaye umukinnyi w’indashyikirwa mu myaka itanu (2000, 2001, 2002, 2009 na 2010 ) akanegukana imidari ya zahabu mu mikino ya Olempike mu mwaka wa 2008 na 2012. Kobe yatoranijwe inshuro 15 muri All Star Games, anatorwa nk’umukinnyi w’imena mu marushanwa ya 2007-2008.