00:00:00 IGIHE NETWORK KN KINYARWANDA EN ENGLISH FR FRANCAIS

REG BBC yatsinze Patriots BBC yisubiza Igikombe cya Shampiyona (Amafoto na Video)

Yanditswe na Iradukunda Olivier
Kuya 19 Nzeri 2022 saa 12:17
Yasuwe :

REG BBC yatsinze Patriots BBC mu mukino wa nyuma wa kamarampaka ku manota 84-74 wabereye muri BK Arena kuri iki Cyumweru, iyitwara igikombe cya shampiyona ku nshuro ya kabiri yikurikiranya.

Umukino watangiye amakipe yombi afite inyota yo gutsinda amanota menshi hakiri kare, ariko amahirwe y’agace ka mbere yegukanwa na REG BBC Ku manota 24-13 ya Patriots BBC.

Amakipe yombi yabaye nk’atangira kugendana acungana ariko n’ubundi umusore wa REG BBC, Cleveland Thomas, akomeza kuyifasha kuguma imbere ya Patriots BBC.

Agace ka kabiri karangiye amakipe yombi yinjije amanota 18 ariko REG BBC iguma imbere ya Patriots BBC ku giteranyo cy’amanota 42-31.

Akaruhuko k’agace ka kabiri karangiye Shyaka Olivier ari we uri kugora Patriots BBC ku buryo yafashije REG BBC gushyiramo andi manota umunani nyuma y’umunota umwe gusa bavuye mu karuhuko.

Mu gace ka gatatu, Patriots BBC yinjiye mu kibuga ishaka gukuramo ikinyuranyo yari yashyizwemo bituma umukino uhindura isura.

Uko umukino wasatiraga umusozo n’abafana bari bamaze gushyuha ku makipe yombi. Abakinnyi na bo bashyushye mu mutwe, byagaragaraga ko kumva ibyemezo by’abasifuzi biri kugorana.

Aha niho Patriots BBC yagaragarije ko ifite abakunzi benshi itangira kugabanya ikinyuranyo kubera umurindi wabo. Aka gace karangiye ikinyuranyo cyagabanutse ari amanota ya Patriots BBC 49 kuri 59 ya REG BBC.

Patriots BBC yagumye ku buryo bwayo bwo gukoresha amakosa menshi ba myugariro ba REG BBC by’umwihariko Kambuyi Manga Pitchou na Shyaka Olivier baburaga ikosa rimwe ngo basohoke mu kibuga.

Iminota itanu ya nyuma yabaye nk’isaha yose kuri REG BBC kuko Patriots BBC itavaga imbere y’agakangara kayo isigamo amanota atanu.

Nubwo iminota yabaye myinshi ku bafana ba REG BBC, Cleveland Thomas na Adonis Filer baciye intege Patriots BBC batsinda amanota atatu gusa.

Adonis Filer watsinze amanota 23, rebounds 11 ndetse anatanga imipira itandatu yavuyemo amanota wenyine, ari mu barwanye kuri bagenzi be asozanya intsinzi ku kinyuranyo cy’amanota 10.

Uyu mukino wari uwa gatanu wahuje impande zombi warangiye REG BBC yegukanye igikombe cya 2021-2022 nyuma yo gutsinda mukeba wayo Patriots BBC amanota 84-74.

Mu mikino itanu ya kamarampaka, REG BBC yatsinzemo itatu mu gihe Patriots BBC yatsinze ibiri.
REG BBC yakatishije itike yo kuzaserukira u Rwanda muri Shampiyona Nyafurika ya Basketball, BAL 2023, yahise ishyikirizwa igikombe cyayo ihabwa na miliyoni 15 Frw mu gihe Patriots BBC yahawe miliyoni 7.5 Frw.

Ishyaka ryari ryose ku makipe yombi
Manga Pitchou wa REG BBC agerageza kuzibira mugenzi we wa Patriots BBC washakaga gutsinda
REG BBC yashimiwe intsinzi yabonye nyuma y'imikino itari yoroshye. Aha umutoza wayo Henry Mwinuka yishimiraga igikombe ikipe ye yegukanye
Shyaka Olivier yishimira igikombe
Shyaka Olivier yambikwa umudari
Shyaka Olivier aganira na Nshobozwabyosenumukiza ku ntsinzi begukanye
REG BBC yari ishyigikiwe n'abafana benshi
REG BBC yahawe ibihembo byayo nyuma yo kuba iya mbere
Patriots BBC yashyikirijwe miliyoni 7.5 Frw
Mpoyo Axel yakozwe ku mutima n'urukundo rw'abafana
Mpoyo Axel yifotozanya n'abakunzi ba REG BBC
Keneth Gasana yitegereza ibiri kuba ku ikipe ye
Kambuyi Manga Pitchou yishimira igikombe
Filer Adonis asuhuza abafana kubera urukundo bamugaragarije
Icyishatse Hervé ukinira REG BBC yapfukamye ashima Imana nyuma y'intsinzi
Imidali yambitswe abakinnyi yari yateguwe
Abafana ba REG bari babukereye kuva ku munota wa mbere kugeza ku wa nyuma
Dj Dizzo ni umwe mu bari bitabiriye uyu mukino

Amafoto: Munyakuri Prince

Video: Muneza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .