00:00:00 IGIHE NETWORK KN KINYARWANDA EN ENGLISH FR FRANCAIS

Umwihariko wa ‘Legacy Tournament’, irushanwa rigiye kuba ku nshuro ya gatatu mu Rwanda

Yanditswe na Israel Ishimwe
Kuya 19 Ukwakira 2022 saa 04:35
Yasuwe :

Ikipe ya United Generation Basketball (UGB) ifatanyije n’Ishyirahamwe ry’Umukino wa Basketball mu Rwanda, FERWABA, yateguye ku nshuro ya gatatu Irushanwa ry’Umurage muri Basketball “Legacy Tournament”.

Iri rushanwa ngarukamwaka rigamije kwibuka Shampiyona Aimable na Nizeyimana Jean de Dieu bagize uruhare mu guteza imbere Basketball mu gihugu hagati ya 1995 na 2007.

Shampiyona yahoze ari Umuyobozi Mukuru wa Lycée De Kigali (LDK), yanashinze ikipe ya Basketball y’iki kigo aba n’umuyobozi wayo. Nizeyimana we yakinnye Basketball anaba umutoza mu makipe arimo na UGB BBC, LDK n’Ikipe y’Igihugu y’u Rwanda.

Nizeyimana yitabye Imana mu 2007 naho Shampiyona atabaruka mu 2004. Bari mu bashinze UGB BBC, aho Shampiyona yari umuyobozi mukuru wayo mu gihe Nizeyimana yayitozaga.

Mu kubazirikana, UGB BBC yateguye irushanwa ry’iminsi icyenda riteganyijwe ku wa 21-29 Ukwakira 2022.

“Legacy Tournament 2022” izitabirwa n’amakipe atandukanye yo mu Rwanda ndetse ku nshuro ya mbere yanatumiwemo ayo hanze yarwo.

Iri rushanwa ryatangiye gutegurwa mu 2018, riri mu byiciro birimo icy’ababigize umwuga mu bagabo n’abagore ndetse n’icy’abakanyujijeho [veterans].

Mu makipe azaryitabira mu bagabo harimo Espoir BBC, UGB BBC, APR BBC na Shoot 4 The Stars. Aya yiyongeraho New Star yo mu Burundi na REG BBC, yashyizwe mu cyiciro cy’ayo ku rwego mpuzamahanga.

Mu cyiciro cy’abagore, hazitabira amakipe atandatu arimo IPRC Huye BBC, REG BBC, The Hoops BBC zo mu Rwanda; PJB na Wonderful zo muri Repubulika Iharanira Demokarasi ya Congo na Young Sisters yo mu Burundi.

Mu batarabigize umwuga hatumiwe UGB BBC, CSK BBC, Patriots BBC na Musanze BBC. Aya makipe yiyongeraho Techno yo mu Burundi na Bakolo yo muri RDC.

Biteganyijwe ko iyi mikino izatangira ku wa Gatanu, tariki ya 21 Ukwakira 2022.

Muhoza Eric uri mu bashinze UGB BBC yabwiye IGIHE ko imikino yo mu cyiciro cya mbere izahuza amakipe yo mu Rwanda mbere y’uko ahura n’ayo ku rwego mpuzamahanga.

Mu bagabo, Itsinda A ririmo Espoir BBC na UGB BBC mu gihe irya B rigizwe na APR BBC na Shoot 4 The Stars.

Yavuze ko aya makipe azahura hagati yayo, akine inshuro ebyiri mu gushaka izaba iya mbere mu itsinda.

Ati “Amakipe namara gukina, mu cyumweru gitaha ni bwo azahura n’ayo ku rwego mpuzamahanga arimo REG BBC na New Star. REG BBC twayishyize mu makipe mpuzahamanga mu kuyiha agaciro kuko izitabira imikino ya BAL.’’

New Star yatumiwe nyuma y’uko Urunani BBC yabaye iya mbere muri Shampiyona y’u Burundi itabonetse kuko igiye kwitabira irushanwa ryo gushaka itike ya BAL mu majonjora azabera muri Tanzania.

Imikino yo mu matsinda izabera muri Gymnase ya Stecol iri i Masoro mu Cyanya cyahariwe inganda mu gihe iya nyuma izabera muri BK Arena.

Mu matsinda imikino ibanza izaba ku wa Gatanu, iyo kwishyura ibe bucyeye bwaho ku wa Gatandatu, tariki ya 22 Ukwakira 2022. Kwinjira byagizwe Ubuntu kuri iyi mikino ariko iya nyuma izishyuzwa.

Muhoza yavuze ko hari amakipe yo mu Rwanda ataritabiriye iri rushanwa arimo Patriots BBC yavuze ko ititeguye neza ndetse na za IPRC zitarabona ingengo y’imari izemerera kwitabira imikino biyoroheye.

Amakipe azitwara neza muri aya marushanwa azahabwa ibikombe ndetse n’ibihembo bitandukanye.

IGIHE yamenye ko ikipe ya mbere mu bagabo izahabwa sheki y’ibihumbi 500 Frw ariko ishobora kuzamurwa mu gihe ibiganiro n’abaterankunga byavamo ubundi bushobozi.

REG BBC na APR BBC ari mu makipe azitabira Irushanwa ry’Umurage muri Basketball “Legacy Tournament” rigiye kuba ku nshuro ya gatatu
Shampiyona Aimable wayoboye Lycée de Kigali (LDK) yitabye Imana mu 2004 mu gihe Nizeyimana Jean de Dieu (iburyo) yatabarutse mu 2007. Bari mu bashinze Ikipe ya UGB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .