Ikipe ya APR BBC yatumiye Al Ittihad Alexandria yo mu Misiri mu mukino wa gicuti uteganyijwe mu mpera za Werurwe 2024.
APR BBC irimbanyije imyiteguro ya BAL 2024 izitabira ku nshuro ya mbere, aho ikomeje gukina imikino ya gicuti mpuzamahanga mu rwego rwo kwitegura neza iri rushanwa.
Umutoza wa APR BBC, Mazen Trakh yabwiye IGIHE ko bateganya imikino ibiri ya gicuti mu mpera za Werurwe.
Ati “Yego mu mpera za Werurwe dufitemo imikino ibiri ya gicuti harimo uwa Al Ittihad yo mu Misiri.”
Amakuru avuga ko atari iyi kipe gusa yo mu Misiri ahubwo ko ishobora no kwiyongeraho Bangui SC yo muri Centrafrique izakina BAL ku nshuro ya mbere uyu mwaka.
Ni ubwo amatariki imikino izaberaho itaramenyekana, biteganyijwe ko yose izabera i Kigali.
APR BBC ikubutse i Doha muri Qatar mu mwiherero w’iminsi 10 aho mu mikino itanu yose yahakinnye yayitsinze.
Al Ittihad Alexandria ni imwe mu makipe y’ubukombe mu Misiri kuko ifite ibikombe 13 bya shampiyona, aho igiheruka mu 2020.
Ni mu gihe Bangui SC yo ikomeje kuzamura urwego nyuma yo gushingwa mu 2017. Iyi kipe niyo ibitse ibikombe bya shampiyona bibiri biheruka (2022 na 2023).
By’umwihariko uyu mwaka izitabira irushanwa rya BAL 2024 aho iri muri Nile Conference hamwe na Al Ahly (Misiri), Al Ahly Benghazi (Libya) na City Oilers (Uganda).
Ku wa Gatatu, tariki 6 Werurwe 2024, iyi kipe irasubukura imikino ya shampiyona, aho irakira UGB saa 20:00 muri Lycée de Kigali.
Ni ku nshuro ya mbere APR BBC igiye kwitabira iri rushanwa rihuza amakipe yabaye aya mbere iwayo rigiye gukinwa ku nshuro ya kane.
Ikipe y’Ingabo iri mu gace ka Sahara Conference kazakinira muri Sénégal kuva tariki ya 4 kugeza 12 Gicurasi 2024, aho kugira ngo ibone itike y’imikino ya ¼ izabera mu Rwanda muri BK Arena, bizasaba ko iba mu makipe abiri ya mbere mu itsinda irimo hamwe na AS Douanes yo muri Sénégal, US Monastir yo muri Tunisia na Rivers Hoopers yo muri Nigeria.
