Ishyirahamwe rya Basketball i Burundi (FEBABU), ryandikiye ikipe ya Dynamo BBC riyihanangiriza ku mwanzuro yari yafashe wo kongera gukina muri BAL yubahirije amabwiriza yose arigenga.
Dynamo BBC y’i Burundi yari yemeye kwambara ‘Visit Rwanda’ ku myambararo yayo, bityo ikaba yagombaga gukomeza imikino ya BAL yari yatangiye neza.
Ku Cyumweru, tariki 10 Werurwe 2024, iyi kipe yahise iterwa mpaga ku mukino yari ifitanye na FUS Rabat yo muri Maroc kubera kwanga gukurikiza amategeko agenga irushanwa n’imyambaro muri BAL mu 2024.
Ubuyobozi bw’Ikipe bumaze gusuzuma neza umwanzuro wafashwe bwandikiye ubuyobozi bwa Basketball Africa League ko ikipe yemera amategeko n’amabwiriza yose agenga irushanwa harimo no kwambara umuterankunga ‘Visit Rwanda’ ku myambararo yayo.
Indi baruwa yanditswe na FEBABU yasohotse mu ijoro ryo ku wa Mbere rishyira ku wa Kabiri, tariki ya 12 Werurwe 2024, isubiza iya Dynamo BBC ndetse ishimangira ko itagomba kurenga ku byo yabwiwe mbere.
Yagize iti “Ubutumwa mwaduhaye ko muzambara ikirango cy’umuterankunga mukuru w’irushanwa ntabwo bwemejwe na FEBABU. Kubera izo mpamvu mugomba gukinana imyambaro musanganwe cyangwa mugahisha icyo kirango nk’uko mwabikoze mbere.”
Muri rusange, Guverinoma y’u Burundi yafashe icyemezo cyo kubuza iyi kipe, yitabiriye bwa mbere kwambara imyambaro iriho Visit Rwanda kubera umwuka mubi umaze iminsi hagati y’u Rwanda n’u Burundi, byanatumye bufata umwanzuro wo gufunga imipaka.
Mu gihe baba batewe mpaga ya Kabiri, byaba bisobanuye ko bahise basezererwa mu irushanwa kandi haziyongeraho ibindi bihano.
