Umukino wabimburiwe n’ibirori byo gufungura iri rushanwa byari biryoheye ijisho, aho abanya-Misiri baturikije ibishashi, bakora ibisa na pyramid mu kibuga ndetse baniyerekana mu myambaro ya kera iranga umuco wabo.

Umunya-Nigeria, Femi Kuti ari kumwe n’umunya-Misiri Hakim na Dobet Gnahore wo muri Côte d’Ivoire, baririmbye muri ibi birori byari byitabiriwe na Perezida wa Misiri, Abdel Fattah el-Sisi, Perezida wa CAF, Ahmad Ahmad na Perezida wa FIFA, Gianni Infatino.

Mahmoud Hassan uzwi nka Trezeguet yatsinze igitego kimwe rukumbi cyabonetse mu mukino ku munota wa 41, nyuma yo guhererzwa na Ayman Ashraf, ajijisha ba myugariro babiri ba Zimbabwe, arabazenguruka, atera umupira mu ruhande umunyezamu Edmore Sibanda atabashije kugeramo, umupira uruhukira mu izamu.

Abakinnyi ba Zimbabwe bari bavuzweho kwanga gukina umukino badahawe uduhimbazamusyi bemerewe mbere y’iri rushanwa, ariko ubwo ikipe yageraga ku kibuga ndetse n’uburyo bihagazeho mu minota imwe y’umukino, byagaragaje ko ntacyo byabatwaye mu mutwe, aho n’umutoza wabo Sunday Chidzambwa yavuze ko bari biteguye neza umukino.

Misiri yihariye umupira mu gice cya mbere, aho yabonye uburyo butandukanye ariko umunyezamu Edmore Sibanda akayibera ibamba. Ku munota wa kabiri gusa, Mohamed Salah yateye umupira mu izamu ashaka bagenzi be, Sibanda awushyira muri koruneri mu gihe uyu mukinnyi ukinira Liverpool mu Bwongereza yakomeje gushaka aho amenera, ariko abanya-Zimbabwe bakamucungira hafi.

Ku munota wa munani w’umukino, Salah yakinannye neza na Abdallah El Said wateye ishoti rikomeye rikurwamo n’umunyezamu wa Zimbabwe, Edmore Sibanda, mugenzi we awusubijemo ujya hanze mbere y’uko Salah afata icyemezo cyo kwinjira wenyine, ateye umupira ukomeye uca hejuru y’izamu.

Mbere gato y’uko umunota wa 20 w’umukino ugera, Zimbabwe yatangiye kunyuzamo igasatira, aho yanabonye uburyo bwiza, Khama Billiat ananirwa kububyaza umusaruro, umupira ushyirwa muri koruneri n’umunyezamu wa Misiri, Mohamed El Shenawy.

Trezeguet na Mohamed Salah bateye amashoti akomeye mu gice cya kabiri, bashaka ikindi gitego, umunyezamu Sibanda ababera ibamba, aho imipira yombi yayishyize muri koruneri mu gihe Ovidy Karuru wa Zimbabwe na we yabonye uburyo bwiza, umunyezamu wa Misiri akuramo umupira yari ateye.

Umukino warangiye Misiri itsinze igitego 1-0, itangira neza mu itsinda A rya CAN 2019. Kuri uyu wa Gatandatu hateganyijwe imikino itatu, aho Repubulika Iharanira Demokarasi ya Congo ihura Uganda guhera saa 16:00 mu itsinda rya mbere mu gihe mu itsinda B hakina Nigeria n’u Burundi guhera saa 19:00 ndetse na Guinée na Madagascar guhera saa 22:00.

Trezeguet acenga Teenage Lingani Hadebe wa Zimbabwe

Mahmoud Trezeguet yafunguye amazamu ku mupira yateye, Edmore Sibanda ntiyabasha kuwugeraho

Abakinnyi ba Misiri bishimira igitego cyabonetse mu minota ya nyuma y'igice cya mbere

Misiri yatangiye neza muri CAN 2019 yakiriye

Mohamed Salah yacungirwaga hafi n'abakinnyi ba Zimbabwe

Abakinnyi ba Zimbabwe bashimira abafana babahereje ubwo umukino wari urangiye

Femi Kuti na bagenzi be basusurukije abaje kureba umukino ufungura Igikombe cya Afurika cya 2019

CAN 2019 yakiriwe na Misiri, yatangiye kuri uyu wa Gatanu

Abafana basaga 74,000 bitabiriye uyu mukino

Muri Stade ya Cairo byari ibirori, hubatswe ibasa na pyramid zizwi muri iki gihugu

Perezida wa Misiri, Abdel Fattah el-Sisi yahaye ikaze ibihugu byose byitabiriye CAN 2019