00:00:00 IGIHE NETWORK KN KINYARWANDA EN ENGLISH FR FRANCAIS

Amateka yanditswe: Mukansanga yabaye umugore wa mbere wasifuye umukino wa CAN y’Abagabo (Amafoto)

Yanditswe na Eric Tony Ukurikiyimfura
Kuya 18 January 2022 saa 06:56
Yasuwe :

Umunyarwandakazi Mukansanga Salima Rhadia yakoze amateka yo kuba umugore wa mbere wasifuye umukino w’Igikombe cya Afurika cy’Abagabo kuri uyu wa Kabiri, aho yayoboye uwo mu Itsinda B wahuje Guinée na Zimbabwe.

Muri uyu mukino wabereye kuri Stade Ahmadou Ahidjo y’i Yaoundé, Mukansanga Salima yari yungirijwe na Olivier Safari Kabene wo muri Repubulika ya Congo ndetse na Lahcen Azgaou wo muri Maroc.

Jean Jacques Ndala wo muri Repubulika Iharanira Demokarasi ya Congo yari umusifuzi wa kane mu gihe Bouchra Kharboubi wo muri Maroc na Ibrahim Abdalla Mohammed wo muri Sudani bari abasifuzi bakoresha ikoranabuhanga ry’amashusho [VAR].

Mukansanga w’imyaka 33 yaherukaga kandi gukora amateka yo kuba umusifuzikazi wa mbere wagaragaye ku mukino wa CAN y’Abagabo ubwo Guinée yatsindaga Malawi igitego 1-0 tariki ya 10 Mutarama 2022. Icyo gihe yari umusifuzi wa kane nk’uko byagenze ubwo Malawi yatsindaga Zimbabwe ibitego 2-1 ku wa Gatanu.

Ikarita ye ya mbere yatanze mu Gikombe cya Afurika nk’umusifuzi wo hagati, ni iy’umuhondo yahaye Ibrahima Cissé wa Guinée ku munota wa 34.

Muri uyu mukino warangiye Zimbabwe itsinze ibitego 2-1, Mukansanga yatanze andi makarita ane y’umuhondo mu gice cya kabiri kuri Talbert Shumba, Kudakwashe Mahachi, Onismor Bhasera (Zimbabwe), Naby Keïta na Mamadou Kane ba Guinée.

Kapiteni wa Syli National, Naby Keïta, ntazakina umukino wa 1/8 kubera iyi karita y’umuhondo yahawe na Mukansanga ku munota wa mbere muri ine y’inyongera ubwo yaburaniraga bagenzi be.

Uretse uyu Munyarwandakazi wenyine ushobora gusifura mu kibuga hagati, abandi bagore bari muri CAN 2021 iri kubera muri Cameroun ni Abanya-Maroc Bouchra Karboubi na Fatiha Jermoumi ndetse n’Umunya-Cameroun Carine Atemzabong.

Gutsindwa kwa Guinée byatumye ikomeza muri 1/8 nk’ikipe ya kabiri n’amanota ane, irushwa inota rimwe na Sénégal yanganyije na Malawi ubusa ku busa mu gihe Zimbabwe yasezerewe ifite amanota atatu.

Mu 2007 ni bwo Mukansanga yatangiye gusifura nk’umusifuzi wemewe na FERWAFA.

Mu 2012, Abanyarwandakazi babaye abasifuzi mpuzamahanga ba FIFA ari batanu, abo hagati babiri barimo na Mukansanga, abandi batatu ari abo ku mpande. Icyo gihe batangiye kubona imikino mpuzamahanga itandukanye.

Ku rwego mpuzamahanga, Mukansanga yatangiye afite inshingano z’umusifuzi wa kane ndetse byasabye gutegereza imyaka ibiri kugira ngo asifure hagati ubwo Zambia yakinaga naTanzania mu 2014 mu gushaka itike y’Igikombe cya Afurika, ari bwo yitwaye neza bikamufungurira amarembo ku ruhando mpuzamahanga.

Guhera icyo gihe, yatangiye gusifura amarushanwa atandukanye arimo All Africa Games ya 2015 i Brazzaville na CECAFA y’abagore ya 2015 yabereye i Jinja muri Uganda.

Kwitwara neza mu marushanwa atandukanye byatumye Mukansanga Salma agirirwa icyizere cyo kuba mu basifuzi bayoboye Igikombe cya Afurika cy’Abagore cyabereye muri Cameroun mu 2016.

Mu 2018 yasifuye mu Gikombe cy’Isi cy’Abangavu batarengeje imyaka 17 cyabereye muri Uruguay. Harimo n’umukino wa ¼ wahuje u Budage na Canada.

Mu 2019, yasifuye Igikombe cy’Isi cy’Abagore cyabereye mu Bufaransa hagati ya tariki ya 7 Kamena n’iya 7 Nyakanga, ahava ajya mu Gikombe cya Afurika cy’Abagabo batarengeje imyaka 23 cyabereye mu Misiri mu Ugushyingo.

Ku mukino Afurika y’Epfo yanganyijemo na Zambia ubusa ku busa muri iki Gikombe cya Afurika cy’Abatarengeje imyaka 23, Mukansanga Salma yakoze amateka yo kuba umugore wa mbere wasifuye iri rushanwa ry’abagabo.

Mu mwaka ushize wa 2021, yakoze amateka yo kuba Umunyarwandakazi wa mbere wasifuye Imikino Olempike, ahereye ku wahuje Ikipe y’Ubwami bw’u Bwongereza na Chili i Tokyo.

Nyuma yo gusifura CAN, Mukansanga Salima azaba ahanze amaso mu Gikombe cy’Isi cy’Abagore kizabera muri Nouvelle-Zélande mu 2023, aho ari mu basifuzi umunani bo muri Afurika bazavamo abitabira iryo rushanwa.

Mukansanga Salima yishyushya mbere y'umukino
Mukansanga ni umwe mu basifuzikazi bakomeje kwandika amateka ku Isi
Mukansanga Salima aganira na Kapiteni wa Guinée, Naby Keita mbere y'umukino
Kapiteni wa Zimbabwe, Knowledge Musona na Naby Keita wa Guinée bifotozanya n'abasifuzi bayobowe na Mukansanga Salima
Mukansanga yabaye umugore wa mbere wayoboye umukino wa CAN y'Abagabo
Knowledge Musona yishimira kimwe mu bitego Zimbabwe yabonye mu gice cya mbere
Musona yatsinze nyuma yo gusimbuka agasumba abakinnyi ba Guinée
Kudakwashe Mahachi (imbere) yishimira igitego cya kabiri cya Zimbabwe hamwe na bagenzi be
Naby Keïta yatsinze igitego kimwe rukumbi cyabonetse ku ruhande rwa Syli National
Ikarita Mukansanga yahaye Naby Keïta yatumye atazakina umukino wa 1/8

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .