00:00:00 IGIHE NETWORK KN KINYARWANDA EN ENGLISH FR FRANCAIS

CAN 2021: Ghana yirukanye umutoza nyuma yo kugayika mu Gikombe cya Afurika

Yanditswe na Bukuru JC
Kuya 23 January 2022 saa 08:53
Yasuwe :

Ishyirahamwe ry’Umupira w’Amaguru muri Ghana ryafashe icyemezo cyo gutandukana n’umutoza Milovan Rajevac nyuma y’uko iki gihugu gisezerewe mu CAN 2021 kitarenze amatsinda.

Mu irushanwa riri kubera muri Cameroun, Ghana ntiyahiriwe nyuma yo gusezererwa ifite inota rimwe rukumbi mu itsinda yarimo hamwe na Maroc, Gabon n’Ibirwa bya Comores, igasoreza ku mwanya wa nyuma.

Gutsindwa n’Ibirwa bya Comores ibitego 3-2 mu mukino yagombaga gutsinda kugira ngo yizere gukomeza muri 1/8, byashimangiye umusaruro mubi wa Black Stars mu mateka yayo ikina Igikombe cya Afurika.

Ku wa Gatandatu ni bwo Ishyirahamwe ry’Umupira w’Amaguru muri Ghana ryafashe icyemezo cyo gusezerera umutoza Milovan Rajevac ndetse byitezwe ko imikino yo gushaka itike y’Igikombe cy’Isi cya 2022 izaba muri Werurwe, izatozwa n’umutoza w’agateganyo.

Rajevc yari yongeye guhabwa Black Stars ya Ghana kuva muri Nzeri 2021 ndetse yayifashije kurenga ijonjora ra kabiri ryo gushaka itike y’Igikombe cy’Isi cya 2022 nubwo umukino yatsinzemo Afurika y’Epfo utavuzweho rumwe.

Mu ijonjora rya gatatu ry’urugendo rugana muri Qatar rizakinwa muri Werurwe, Ghana yatomboye kuzahura na Nigeria iri mu makipe akomeje kwerekana ko ahagaze neza mu Gikombe cya Afurika kigeze muri 1/8.

Milovan Rajevac yirukanywe na Ghana nyuma yo gusezererwa mu Gikombe cya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .