Ikipe y’u Bubiligi, ntabwo yari yabanjemo abakinnyi bayo bakomeye nka rutahizamu wa Real Madrid, Eden Hazard na Kevin De Bruyne wa Manchester City.

Ni umukino watangiye Saa tatu z’ijoro ariko utigeze ugora ikipe y’u Bubiligi kuko ku munota wa cumi na rimwe gusa Lukaku yari yafunguye amazamu ku ruhande rw’u Bubiligi ku mupira yatsindishije ukuguru kwe kw’ibumoso.

Ntabwo byatinze, Thomas Meunier wagiye mu kibuga asimbuye Timothy Castagne wagize imvune, yahise atsinda igitego cya kabiri ku munota 34 gusa. Iminota 45 yarangiye u Bubiligi buri imbere na 2-0. Ni umukino wabereye mu Mujyi wa St. Petersburg.

Mu gice cya kabiri, ikipe y’u Bubiligi n’ubundi yagarukanye imbaraga, ikomeza kurusha cyane ikipe y’u Burusiya, ariko biza gusaba iminota icumi ya nyuma ngo ibone igitego cya gatatu.

U Bubiligi bwaje gukora izindi mpinduka ku munota 72, Dries Martens asimburwa na Eden Hazard, izindi mpinduka bazikoze ku munota wa 77, ubwo Jan Vertonghen na Yannick Carrascon bahaga umwanya Thomas Vermaelen na Dennis Praet.

Mu gihe u Bubiligi bwakoraga izi mpinduka, u Burusiya bwo bwari bwabanje gusimbuza kuko ku munota wa 30, Daler Kuzyaev yasimbuwe na Denis Cheryshev ngo burebe ko bwakwishyura ibitego bibiri bwatsinzwe. Ku munota wa 43 u Burusiya bwongeye gukoramo Yuri Zhirkov wasimbuwe na Vyacheslav Karavaev.

Gusa izi mpinduka z’u Burusiya ntacyo zatanze, ari nayo mpamvu ku munota wa 46 bwongeye gusimbuza, Dmitri Barinovgor yasimbuwe na Igor Diveer. Hanyuma ku munota wa 63 bongera gukuramo abakinnyi babiri, Roman Zobnin na Denis Chershev wasimbuwe na Aleksey Miranchuk ariko izi mpinduka zose ntacyo zamariye u Burusiya.

Nyuma yo gukomeza kurusha u Burusiya, ku munota wa 88 Romelu Lukaku yongeye kubona izamu ku ruhande rw’u Bubiligi ku mupira yari ahawe na Thomas Meunier, maze atsindisha akaguru ke k’iburyo.

Umukino warangiye u Bubiligi bwegukanye intsinzi muri itsinda, bituma buyobora itsinda, bukanganya amanota na Finland yatsinze 1-0 Denamark.

Rutahizamu w’u Bubiligi, Romelu Lukaku niwe wabaye umukinnyi mwiza kurusha abanda kuri uyu mukino.

Uyu mukino woroheye u Bubiligi

Meunier (15) na Lukaku (9) nibo bahesheje intsinzi u Bubiligi

Lukaku agitsinda igitego cya mbere, yagiye imbere ya Camera abwira Christian Eriksen ko amukunda.

Lukaku niwe wahembwe nk'umukinnyi witwaye neza mu mukino kurusha abandi

Igitego cya mbere yagituye Eriksen wari uri kwa muganga

Lukaku yavuze ko yagowe no gukina uyu mukino atekereze uko mugenzi we Christian Eriksen ameze nyuma yo kugira ikibazo cy'umutima

U Bubiligi bwahise buyobora itsinda rya kabiri (B)

Thomas Meunier (wateye ishoti mu izamu) yabaye umukinnyi utsinze igitego cyihuse kandi yasimbuye