Aya makipe yombi yo mu Bwami bw’u Bwongereza yahuye bwa mbere mu irushanwa rikomeye muri EURO 1996, yakiniye imbere y’abafana 22.500 ndetse abona uburyo butandukanye bwo gutsinda.

U Bwongereza bwashoboraga gufungura amazamu mbere ku mupira wa koruneri yatewe na Mason Mount, John Stones ashyizeho umutwe, ufata igiti cy’izamu.

Ecosse yari yatsinzwe na Repubulika ya Tchèque ku munsi wa mbere, yanyuzagamo igasatira ndetse yabonye uburyo bwiza bwa Stephen O’Donnell, umupira ukurwamo na Jordan Pickford mu gihe Reece James yakuye umupira wa Lyndon Dyke ku murongo mu gice cya kabiri.

Kunanirwa gutsinda Ecosse bivuze ko u Bwongereza busabwa byibuze inota rimwe imbere ya Repubulika ya Tchèque bizahura ku wa Kabiri hasozwa itsinda D.

Repubulika ya Tchèque na yo yagize amanota ane ndetse iyobora itsinda D nyuma yo kunganya na Croatia igitego 1-1. Patrik Schick wujuje ibitego bitatu mu irushanwa ry’uyu mwaka, yafunguye amazamu kuri penaliti yo ku munota wa 37, igitego cyishyurwa na Ivan Perišić ku munota wa 47.

Undi mukino wabaye ku wa Gatanu ni uwo mu itsinda E, aho Suède yagize amanota ane nyuma yo gutsinda Slovakia igitego 1-0 cyinjijwe na Emil Forsberg kuri penaliti yo ku munota wa 77.

Kuri uyu wa Gatandatu hateganyijwe imikino yo mu itsinda F rifatwa nk’iry’urupfu, aho Portugal ikina n’u Budage guhera saa Kumi n’ebyiri z’umugoroba.

Portugal yatangiye itsinda Hongrie ibitego 3-0 mu gihe Budage bwo bwari bwatsinzwe n’u Bufaransa igitego 1-0.

U Bufaransa burahura na Hongrie guhera saa Cyenda mu mukino ushobora kubufasha kuyobora itsinda mu gihe undi mukino uteganyijwe kuri uyu wa Gatandatu uhuza Espagne na Pologne guhera saa Tatu z’ijoro mu itsinda E.

Raheem Sterling ahanganiye umupira n'abakinnyi babiri ba Ecosse

Abakinnyi babiri ba Chelsea: Billy Gilmour na Mason Mount bari bahanganye

Che Adams agerageza uburyo bw'ishoti ryanyuze ku ruhande rw'izamu ry'u Bwongereza

Umunyezamu wa Ecosse, David Marshall, areba umupira watewe na John Stones aho ugana

Declan Rice na Tyrone Mings bagaragaye basa n'abashwana nyuma yo gusatirwa na Ecosse

Jack Grealish wasimbuye, yagerageje gufasha u Bwongereza ariko agorwa n'ubwugarizi bwa Ecosse

John Stones yabonye umupira yateye n'umutwe ukubita igiti cy'izamu

Reece James akura umupira mu izamu nyuma yo guterwa na Lyndon Dykes

Reece James atera ishoti ryanyuze hafi y'izamu rya Ecosse

Jordan Pickford yakuyemo umupira watewe na Stephen O'donnell mu gice cya mbere

Phil Foden na Grealish bananiwe kwakira uburyo banganyije umukino

Abakinnyi ba Ecosse bashimira abafana ubwo umukino wari urangiye

Billy Gilmour ni we wahawe igihembo cy'umukinnyi witwaye neza