Nibura abakinnyi 7 ba Argentina n’u Budage bari muri Brazil baragaragara mu 10 bahatanira igihembo cy’umukinnyi mwiza w’igikombe cy’Isi 2014 (Golden Ball) usimbura Umunya Uruguay, Diego Forlan wagitwaye mu 2010, akazamenyekana ku Cyumweru.

U Budage: Mats Hummels, Toni Kroos, Philipp Lahm na Thomas Muller

Hummels myugariro wo hagati w’u Budage yafashije cyane iyi kipe mu kurinda izamu yongeraho no gutsinda ibitego bibiri Portugal mu matsinda n’icy’intsinzi cyasezereye u Bufaransa muri 1/8.

Toni Kroos akina hagati h’u Budage na Bayern Munich yayoboye umukino w’iyi kipe igiye gukina umukino wa nyuma na Argentina, yiyerekana cyane ku mukino batsinzemo Brazil ibitego 7-1 yinjije bibiri.

Lahm, kapiteni w’u Budage na Bayern Munich yabanje gukina hagati mbere yo gusubira inyuma iburyo yari asanzwe akina.

Muller watangiye iyi mikino atsinda Portugal ibitego 3 wenyine. Rutahizamu wa Bayern Munich wari watwaye igihembo cy’umukinnyi watsinze ibitego byinshi mu gikombe cy’Isi cya 2010, afite ibitego 5 mu mikino itandatu amaze gukina.

Argentina: Lionel Messi, Angel Di Maria na Javier Mascherano

Nubwo nyuma y’imikino yo mu matsinda, Messi ataratsindira Argentina igitego, yagize uruhare muri byinshi batsinze n’umukino wagejeje Argentina ku mukino wa nyuma hari hashize imyaka ine. Messi yatsinze ibitego 4 abona n’igihembo cy’umukinnyi mwiza w’umukino kane.

Iruhande rwa Messi, Di Maria yafashije kuyobora abashakira ibitego Argentina, harimo amashoti maremare yateraga mu izamu, yatsinze igitego cyatumye basezerera u Busuwisi muri 1/8 cy’irangiza.

Kuba mu mikino 6 Argentina yakinnye yaratsinzwemo bitatu gusa, byagaragaje uruhare rwa Javier Mascherano, myugariro wa FC Barcelona .

Ku myaka 22, Neymar wari wahawe inshingano zo kugeza kure Brazil yatsinze ibitego bine, yavunitse muri ¼ bituma asezererwa.

Umunya Colombia, James Rodriguez wari watowe nk’umukinnyi mwiza w’amatsinda, yatsinze ibitego 6 mu mikino itanu byatumye Colombia igera muri¼ cy’irangiza.

Umuholandi Arjen Robben niwe wuzuza iri tsinda ry’abakinnyi 10, yafashije u Buholandi kuva ku mukino ubanza wa Espagne nubwo basezerewe na Argentina muri ½ cy’irangiza.

Mu banyezamu batatu bahatanira Golden Glove barimo Keylor Navas wa Costa Rica, Manuel Neuer w’u Budage na Sergio Romero ufatira Argentina. Mbere ya 2010 iki gihembo cyari cyaritiriwe umunyezamu wa Leta Zunze Ubumwe z’Abasoviyeti, Nyakwigendera Lev Yashin cyatangiye gutangwa mu 1994. Iker Casillas wa Espagne yagitwaye mu 2010.

Umuholandi Memphis Depay n’Abafaransa Paul Pogba na Raphael Varane bo barahatanira igihembo cy’umukinnyi ukiri muto utarangeje imyaka 21, cyahawe bwa mbere Umudage Luca Podolski mu 2006. Mu 2010 cyatwawe na Thomas Muller wari ufite imyaka 20.

Abahabwa igihembo muri buri gice batorwa n’itsinda ry’impuguke za FIFA.

Abatsindiye iki gihembo cyatangiye gutangwa mu 1982

1982, muri Espagne: Paolo Rossi (u Butaliyani)

1986, Mexique: Diego Maradona (Argentina)

199, u Butaliyani: Salvatore Schillaci (u Butaliyani)

1994, USA: Romario (Brazil)

1998, u Bufaransa: Ronaldo (Brazil)

2002, Korea y’Epfo/ u Buyapani: Oliver Kahn (u Budage)

2006, u Budage: Zinedine Zidane (u Bufaransa)

2010, Afurika y’Epfo: Diego Forlan (Uruguay)

---