Iki gikombe kizatangira tariki 13 Mutarama kugeza tariki 11 Gashyantare 2024. Abakinnyi baturutse ku migabane itandukanye y’Isi b’Abanyafurika bahagaze neza ndetse n’abakunzi ba ruhago ku Isi yose bategereje guhanga amaso.

IGIHE yabahitiyemo batandatu muri bo bahanzwe amaso kurusha abandi.

6. Sadio Mané

Umunya-Sénégal, Sadio Mané w’imyaka 31 amaze gutsindira Al Nassr ikina Shampiyona y’Icyiciro cya mbere muri Arabie Saoudite igeze ku munsi wa 18 ibitego bitandatu mu mikino 16.

Ni Kapiteni wa Intare za Teranga, Ikipe y’Igihugu ya Sénégal ndetse ni na we umaze igihe afite agahigo ko kuyitsindira ibitego byinshi bigera kuri 40 aho akurikirwa na Hanry Camara n’ibitego 31 gusa wasezeye ku mupira w’amaguru.

Mane amaze gutsinda ibitego umunani mu marushanwa atatu y’Igikombe cya Afurika amaze kwitabira mu 2017, 2019 n’iriheruka rya 2022 ryabereye muri Cameroun, ryegukanywe n’Igihugu cye ku nshuro ya mbere mu mateka ya Cyo.

5. André Onana

Umunyezamu wa Manchester United yagize intangiriro zitari nziza muri Shampiyona y’Abongereza nubwo ari we uyoboye abanyezamu bakinnye imikino myinshi batarinjizwa igitego igera kuri itandatu.

Onana watangiye gufatira Ikipe y’Igihugu ya Cameroun mu 2016 yari yayisezeyemo ubwo yari mu Gikombe cy’Isi tariki 23 Ukuboza 2022 muri Qatar nyuma yo kunenga amayeri y’Umutoza Rigobert Song utoza izi Ntare za Cameroun.

Nyuma y’amezi umunani Onana wabisabwe na Perezida w’Ishyirahamwe rya Ruhago muri iki Gihugu, Samuel Eto’o, yatangaje ko agarutse mu Ikipe y’Igihugu tariki 29 Kanama 2023.

Onana w’imyaka 27 yakiniye Igihugu cye cya Cameroun imikino 37.

4. Serhou Guirassy

Umunya-Guinea, Serhou Guirassy ukinira VFB Stuttgart ni we Munyafurika umaze gutsinda ibitego byinshi muri Shampiyona zo ku mugabane w’u Burayi na 17 mu mikino 14 gusa amaze gukina muri Shampiyona y’Ubudage, Bundesliga.

Guirassy w’imyaka 27 wavukiye mu Bufaransa ndetse anakinira Les Blues mu byiciro byose by’abato haba abari munsi y’imyaka 16, 19 na 20 ntafite amateka ahambaye mu Ikipe y’Igihugu ya Guinea yatangiye gukinira mu 2022 kuko amaze kuyitsindira ibitego bitatu mu mikino 12.

Guinea ya Guirassy iri mu Itsinda C, hamwe na Cameroon, Sénégal na Gambia.

3. Victor Osimhen

Rutahizamu w’Umunya-Nigeria, Victor Osimhen ukinira Napoli yo mu Butaliyani ni inyenteri muri ba rutahizamu ku mugabane w’Uburayi.

Uyu rutahizamu wa Napoli yifujwe n’amakipe menshi akomeye arimo Chelsea, Arsenal, Paris Saint Germain n’andi yo mu Barabu.

Osimhen w’imyaka 24 gusa yatangiye gukinira Ikipe y’Igihugu nkuru ya Nigeria afite imyaka 18 gusa mu 2017 nyuma yo guca mu byiciro bito byayo, akaba amaze kuyitsindira ibitego 20 mu mikino 27 ndetse aza ku mwanya wa kane mu bamaze kunyeganyeza inshundura nyinshi muri Super Eagles nyuma ya Rashidi Yekini ufite 37, Patrick Odegbami ufite 27 na Yakubu Ayegbeni na 21.

Osimhen amaze gukina Irushanwa ry’Igikombe cya Afurika rimwe mu 2019, yabuze amahirwe yo gukina irya 2021 kubera icyorezo cya COVID-19 nk’uko byatangajwe n’Ikipe ye ya Napoli ibintu byakuruye impaka ndende iwabo muri Nigeria.

Kuri Osimhen wasoje Shampiyona y’umwaka ushize ahiga abandi mu kunyeganyeza inshundura muri Serie A n’ibitego 26 kuri ubu muri Shampiyona y’u Butaliyani, igeze ku munsi wa 17, Victor Osimhen afite ibitego birindwi.

2. Mohamed Salah

Umwami wa Ruhago ya Misiri ategerejwe n’abatari bacye haba iwabo, muri Afurika ndetse n’Isi yose muri rusange.

Nyuma yo gutsindwa na Sénégal ku mukino wa nyuma w’Igikombe cya Afurika 2022 kuri penaliti 4-2 nyuma y’uko amakipe yombi anganyije 0-0, Mohamed Salah w’imyaka 31 arifuza gusoza gusezera mu Ikipe y’Igihugu nibura ayihesheje Igikombe cya Afurika.

Uyu rutahizamu watangiye gukinira Misiri mu 2011 amaze gukinira Igihugu cye imikino 95 ndetse yagitsindiye ibitego 55, arifuza guca agahigo k’umukinnyi watsindiye Les Pharaons ibitego byinshi gasanzwe gafitwe n’Umutoza wa Al Massr, Hossam Hassan n’ibitego 68.

Mohamed Salah amaze gutsindira Liverpool ibitego 202 bimugira uwa gatatu ku rutonde rw’abamaze guca aka gahigo inyuma ya Ian Rush watsinze 336 na Roger Hunt n 261.

Muri Shampiyona y’uyu mwaka Mo Saha afite ibitego 12 ku mikino 18.

1. Mohammed Kudus

Umunya-Ghana, Mohammed Kudus w’imyaka 23 ukina afasha ba rutahizamu ni umwe mu bakinnyi bari kuvugwa cyane muri Shampiyona y’Ubwongereza nyuma yo gutsinda ibitego bitatu mu mikino ibiri harimo n’icyo yatsinze Ikigugu Manchester United.

Kudus werekeje muri West Ham avuye muri Ajax d’Amsterdam yo mu Buholandi yakuruye amaso y’abakunzi ba ruhago batari bake dore ko kugeza ubu amaze gutsinda ibitego bitandatu muri Shampiyona y’Ubwongereza ndetse na bibiri muri UEFA Europa League.

Uyu musore amaze gutsindira Ghana ibitego icyenda mu mikino 30 amaze gukinira Igihugu cye guhera mu 2019. Nta Gikombe cya Afurika na kimwe adakina kuko nubwo yari yashyizwe ku rutonde rw’abari gukina icya 2021 yagize ikibazo cy’imvune yatumye atakigaragaramo.

Sadio Mané uheruka kwegukana Igikombe cy'Afurika giheruka na Sénégal ari mu bahanzwe amaso mu cy'umwaka utaha

Umunya-Cameroun ufatira Manchester United, André Onana ni we uyoboye abanyezamu bamaze gukina imikino imyinshi batinjijwemo igitego muri Shampiyona y'u Bwongereza ingana n'itandatu, nawe ategerejwe n'imbaga y'abakunzi ba ruhago mu Ntare z'Inkazi zitozwa na Rigobert Song

Serhou Guirassy ukinira Stuttgart yo mu Budage ni we Munya-Afurika umaze gutsinda ibitego byinshi muri Shampiyona zo ku mugabane w'Uburayi zose ndetse ategerejwe mu Gikombe cy'Afurika aho azaba akinira Igihugu cye cya Guinea

Rutahizamu Victor Osimhen wa Napoli ni we watsinze ibitego byinshi muri Serie A y'Abataliyani iumwaka ushize bingana na 26 kuri ubu ategerejwe na benshi kuko byitezwe ko agomba kuzamura ibitego bye 20 mu Ikipe y'Igihugu ngo ashyikire Rashidi Yekini ufite 37

Mohamed Salah ukinira Liverpool akaba na Kapiteni wa Misiri ni umwe mu bakinnyi bahanzwe amaso na benshi ndeste witezweho gufasha abasore ba Phalaon kwegukana Igikombe cy'Afurika atarafataho mu biganza bye

Mohammed Kudus uri kwitwara neza muri West Ham iri ku mwanya wa karindwi muri Shampiyona y'u Bwongereza yitezweho kwigaragaza cyane mu Nyenyeri zirabura za Ghana mu Gikombe cy'Afurika cy'umwaka utaha