Abakunzi ba Musanze FC basabye ko asaga miliyoni 4 Frw yaguzwe abakinnyi badakina yagaruzwa

Yanditswe na N.Kubwimana Janvière
Kuya 3 Mutarama 2020 saa 10:43
Yasuwe :
0 0

Bamwe mu bakunzi n’abakurikiranira hafi Ikipe y’Akarere ka Musanze, Musanze FC, barasaba ko amafaranga asaga miliyoni 4 Frw yaguzwe abakinnyi babiri ariko batigeze bakandagira mu kibuga na rimwe yagaruzwa agakoreshwa ibindi bikorwa.

Aba bakinnyi baguzwe muri Mutarama 2019 ubwo imikino y’umwaka wa shampiyona 2018-2019 yari igeze hagati ni umunyezamu Nzarora Marcel waguzwe miliyoni 1.5 Frw n’Umunya-Cameroun Didier Touya waguzwe miliyoni 3 Frw nka rutahizamu.

Aba bombi bamaze amezi atandatu bahembwa kandi batarigeze bakandagira mu kibuga na rimwe.

Zimwe mu mpamvu zigarukwaho n’abakunzi ba Musanze FC bavuga ko aba bakinnyi baguzwe mu buryo bw’amanyanga ngo ni uko binjiye muri Musanze FC umubare w’abo iyi kipe yari yemerewe gukoresha (abakinnyi 30) wari wararangiye nk’uko amategeko y’Ishyirahamwe ry’Umupira w’Amaguru mu Rwanda (FERWAFA) abigena, ibi bikaba byaratumye bamara amezi atandatu bahembwa ariko badakina.

Nzitonda Faustin ni umwe mu bafana ba Musanze FC, yagize ati "Ikipe yacu ifite ibibazo byinshi bituma idatera imbere, bamwe barayubaka abandi bagasenya. Nonese kubona bagura abakinnyi akayabo k’amafaranga angana kuriya, ntibakore icyo baguriwe si igihombo gikomeye? Ababishinzwe bakurikirane iby’ariya mafaranga agarurwe mu ikipe akoreshwe ibindi bikorwa.”

Umwe mu banyamakuru bakurikiranira hafi iby’imikino muri Musanze FC na we yagize ati “Niba abayobozi bashaka ko Musanze FC itera imbere, bagomba kubanza gukurikirana umuntu ugura abakinnyi ku mpamvu ze bwite, azi neza ko batazakina kuko badakenewe, bakamara igihe kinini bahembwa kandi badakina.’’

"Kuba Nzarora Marcel na Touya Didier bamaze amezi atandatu bahembwa badakora ni kimwe mu bituma ikipe idatera imbere, turasaba ko amafaranga baguzwe yagarurwa mu karere.”

Guverineri w’Intara y’Amajyaruguru, Gatabazi Jean Marie Vianney, yasabye abayobozi b’Akarere ka Musanze gukurikiranira hafi iki kibazo.

Ati “Niba hari abaguze abakinnyi badakenewe ubwo bari babifitemo inyungu. Meya agomba gukurikirana iki kibazo aya mafaranga yahombeje ikipe akagaruzwa, ntabwo abantu bamwe bazajya bubaka ikipe ngo abandi basenye, hagomba gukorwa ibishoboka byose ikipe igashimisha abaturage kuko ni iyabo.”

Jean Didier Touya yatangiye gukinira Musanze FC muri uyu mwaka w’imikino watangiye mu Ukwakira 2019 mu gihe Nzarora Marcel yavuye muri iyi kipe yo mu Majyaruguru muri Nyakanga, atayikiniye umukino n’umwe.

Kugeza ubu Musanze FC iri ku mwanya wa 13 n’amanota 12 ku rutonde rwa Shampiyona y’umwaka wa 2019-2020, nyamara yari yarihaye intego ko iyi shampiyona izarangira iri mu myanya itandatu ya mbere.

Jean Didier Touya yatangiye gukinira Musanze FC muri uyu mwaka w'imikino wa 2019/20
Nzarora Marcel (uhagaze) yavuye i Musanze adakandagiye mu kibuga
Musanze FC yatsinze umukino umwe gusa muri 15 yakinnye mu gice kibanza cya Shampiyona y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .