Rajindraparsad Seechurn wasifuye umukino wahuje Guinea Equatorial na Tunisia yahanishijwe amezi atandatu adakandagira mu kibuga, kubw’imisifurire mibi yabaye intandaro y’imvururu zashoje umukino wahuje aya makipe.

Akanama gashinzwe imyitwarire mu ishyirahamwe ry’umupira w’amaguru muri Afurika (CAF) kemeje ko uyu musifuzi ukomoka mu birwa bya Maurice yafashe icyemezo ‘gikennye’ ubwo yahaga Guinea penaliti ku munota wa nyuma w’umukino, ikaba intandaro y’isezererwa rya Tunisia muri ¼ cy’irushanwa.

Akanama ka CAF kandi kagaragaje ko ikipe y’abarabu nayo itabaye shyashya kuko batoteje umusifuzi bakamwuka inabi bashaka no kumukubita, bityo nayo bayihanisha kwishyura amande y’amadolari ibihumbi 50.

CAF yagaragaje kandi ko umuyobozi w’ishyirahamwe ry’umupira w’amaguru muri Tunisia nawe ubwe yamanutse mu kibuga ashaka gukubita umusifuzi, ariko we n’abakinnyi be bagakomwa mu nkokora n’abashinzwe umutekano babaye ibamba.

Uyu mukino wari ishiraniro…

Ahmed Akaichi yatsindiye igitego Tuniziya ku munota wa 70, ku ishoti yayoboreye mu izamu ryari ritewe na Hamza Mathlouthi.Ku munota wa gatatu w’inyongera ari nawo wa nyuma, Javier Balboa yatsinze penaliti abakinnyi ba Tuniziya bijujutiye bavuga ko nta kosa bakoreye ku mukinnyi Guinea.

Iyi penaliti yakurikiwe n’ubushyamire bw’abakinnyi ku mpande zombi, cyane aba Tuniziya banashatse gusagarira umusifuzi, kamarampaka yari iminota 30 y’inyongera.

Ku munota wa 12 w’igice cy’inyongera, Balboa yatsinze igitego cya kabiri cya Guinea Equatorial ku mupira yatereye muri metero 25 ahana ikosa, Tunisia irasezererwa.

[email protected]