Ni umukino wagombaga gusubiza icyizere abafana ba APR FC bari bamaze iminsi binubira imyitwarire y'ikipe yabo nyuma yo gukina imikino ine irimo ibiri ya gicuti igatsindamo umwe gusa.

Mbere y'uyu mukino, abafana n'abakinnyi babanje gusabana imbabazi nk'uko byari biteganyijwe maze bawinjiramo bahumeka umwuka umwe.

Igice cya mbere cyarangiye nta kipe irebye mu izamu ry'indi. Mu gice cya kabiri ni ho umukino wahinduye isura, ku munota wa 55 Umunya-Cameroun, Apam Bemol Assongwe yafunguye amazamu ku mupira mwiza yahawe na Kwitonda Alain 'Bacca'.

APR FC yakomeje gusatira maze ku munota wa 88 Mugisha Gilbert winjiye mu kibuga asimbuye ashyirwamo igitego cya kabiri ku mupira mwiza yahawe na Myugariro w'Iburyo, Omborenga Fitina.

Nyuma y'umukino abakinnyi ba APR FC bagiye gushimira abafana aho bahereye mu gice kidatwikiriye, Kwitonda Alain witwaye neza muri uyu mukino ni we wanimburiye abandi maze abanza kibabyinira mbere yo kubakora mu ntoki ahereye ruhande.

Hashize akanya bagenzi be na bo baje bamukurikiye maze bashimira abafana baje kubashyigikira kugeza bitwaye neza muri uyu mukino.

Umunya-Sudani Shaiboub Sharaf Eldin Ali udahwema gusaba imbabazi iyo ikipe ititwaye neza, yaje imbere y'abafana maze arambura amaboko arunama abashimira uburyo bagiye inyuma y'Ikipe kugeza isezereye Gaadiidka FC mu injonjora rya mbere.

Abakinnyi bimukiye mu gice cya gitwikiriye cyari cyicawemo n'Itsinda rya Intare za APR FC maze babakomera amashyi ari nako Kwitonda acishamo akabyina.

Umutoza wongera Imbaraga Abakinnyi, Umunya-Tunisia Adel Zrane, yagiye akora mu ntoki abana batoragira imipira mu rwego rwo kwishimana na bo intsinzi.

APR FC izahura na Pyramids FC yo mu Misiri mu ijonjora rya kabiri rya CAF Champions League aho umukino ubanza uteganyijwe hagati ya tariki 15-17 Nzeri mu gihe uwo kwishyura uzakinwa hagati ya tariki 29 Nzeri- 1 Ukwakira 2023.

Amafoto: Ntare Julius