Uyu mukino wabaye kuri uyu wa Gatanu warangiye amakipe yombi anganya ibitego 2-2. Wari ufite kinini uvuze cyane cyane kuri APR FC iribwa isataburenge na mukeba wayo Rayon Sports.

Iyi Kipe y’Ingabo z’Igihugu yasabwaga kudatakaza inota na rimwe kugira ngo ikomeze ishyire umwitangirizwa uzayisindagiza kugeza ku mukino wa nyuma wo ku munsi wa 30 wa Shampiyona ikiri ku mwanya wa mbere bityo yizere kwegukana igikombe bidasubirwaho.

Abafana ba APR FC baje bafite icyizere ko ikipe yabo yegukana amanota atatu, ndetse batangira kwirema agatima isoje igice cya mbere iyoboye n’igitego 1-0 cyatsinzwe na rutahizamu wayo ukiri muto Byiringiro Lague ku munota wa 28 w’umukino.

Amahirwe yayoyotse mu gice cya kabiri ubwo AS Kigali yagarukaga yahinduye umukino ndetse iza kubona igitego cyo kunganya nyuma y’iminota itatu gusa gitangiye, ku gitego cyatsinzwe na rutahizamu ukomoka mu Burundi, Ndarusanze Jean Claude, ku munota wa 48.

Ikipe y’Abanyamujyi yaje kubona ikindi gitego cya kabiri cyatsinzwe na Nshimiyimana Ibrahim winjiye mu kibuga asimbuye, agitsinda ku munota 83 amaze iminota ine yinjiye mu kibuga.

APR FC yari imaze kujya ku gitutu gikomeye yaje kubona igitego cyayihesheje inota rimwe cyatsinzwe na rutahizamu Hakizimana Muhadjili wujuje ibitego 14 muri shampiyona. Umukino waje kurangira amakipe yombi anganyije ibitego 2-2.

Umusaruro APR FC yabonye muri uyu mukino ntiwishimiwe n’abakinnyi bayo ndetse ku masura yabo basaga n’abacitse intege; uhereye kuri Kapiteni wayo Mugiraneza Jean Baptiste ‘’Migi’’ wahagaze umwanya munini mu kibuga hagati atariyumvisha ibimubayeho.

Myugariro wo ku ruhande rw’iburyo muri APR FC, Ombolenga Fitina, we yicaye mu kibuga akanya maze Fuadi Ndayisenga ukina afasha abasatira izamu muri AS Kigali aza kumwihanganisha ndetse no kumufasha guhaguruka ariko biba iby’ubusa akomeza kwicara.

Nsabimana Eric ‘’Zidane’’ akaba na Kapiteni wa gatatu wa AS Kigali yari afite akazi gakomeye ko kugerageza guhumuriza Herve Rugwiro watunguwe n’ibyavuye mu mukino w’uyu munsi.

Si Rugwiro gusa kuko yavuye mu kibuga hagati akajya mu izamu rya Kimenyi Yves wari wahagaze umwanya munini yibaza ibibaye ku ikipe ye yakomeje kugenda biguru ntege mu rugendo rugana ku gikombe. Uyu we yaje kuhamukura maze bakomezanya bagana mu rwambariro.

Kapiteni Migi nyuma yo kugarura intege yagiye guhagurutsa Ally Niyonzima wavuye muri AS Kigali muri uyu mwaka w’imikino wari ugaramye mu kibuga; agihaguruka yahise asanganirwa n’umutoza w’abanyezamu ba AS Kigali, Higiro Thomas na we wamubwiye amagambo amukomeza, nyuma yaje gukuramo umupira asohoka mu kibuga yambaye isengeri hejuru.

Nyuma y’umukino, abafana ba APR FC bumvikanye mu magambo agaragaza ko amahirwe ku gikombe yayoyotse, bamwe basaba ko bagarurirwa Jimmy Mulisa agahabwa ikipe nk’umutoza mukuru.

Nyuma y’iminsi 26 ya Shampiyona, APR FC ubu iri ku mwanya wa mbere by’agateganyo n’amanota 59 aho izigamye ibitego 28, ikaba ikurikiwe na mukeba Rayon Sports irusha amanota abiri gusa n’ibitego 27 izigamye. AS Kigali yo iri ku mwanya wa gatandatu n’amanota 34.

Ikipe ya Rayon Sports niramuka itsinze umukino izahuramo na Police FC ku Cyumweru izahita ifata umwanya wa mbere by’agateganyo

Abatoza ba APR FC yaba umukuru Zlatko, Jimmy Mulisa wungirije ndetse n'ushinzwe kongerera ingufu abakinnyi, Didier Bizimana bose ntibiyumvishaga uko AS Kigali ibahagamye

Nsabimana Eric Zidane yari afite akazi ko guhumuriza abakinnyi batandukanye ba APR FC

Myugariro wo hagati Buregeya Prince ufatanya na Herve Rugwiro ntibumvaga neza ukuntu batsinzwe na AS Kigali ibitego bibiri

Ally Niyonzima yaryamye mu kibuga umwanya munini yacitse intege

Hakizimana Muhadjili watsinze igitego cya kabiri umusifuzi yabaye akivuza ifirimbi ya nyuma maze aryama mu kibuga kubera agahinda

Kapiteni wa APR FC Mugiraneza Jean Baptiste Migi na myugariro we Herve Rugwiro bakibaza ku bibabayeho igihe umusifuzi yari amaze kuvuza ifirimbi ya nyuma

Migi yamaze umwanya munini mu kibuga hagati atariyumvisha ukuntu ikipe ayoboye inganyije na AS Kigali

Myugariro wo hagati Herve Rugwiro yaguye mu kantu

Fuadi Ndayisenga yagerageje guhagurutsa Ombolenga Fitina ariko amubera ibamba akomeza kwicara yibaza ku bimubayeho

Ally Niyonzima agaramye mu kibuga, Blaise Itangishaka amwitegereza igihe umusifuzi yarangizaga umukino ushobora kubabera intandaro yo kubura igikombe cya Shampiyona

Hashize akanya umunyezamu wa APR FC, Kimenyi Yves ahagaze mu mazamu yinjiyemo ibitego byombi byatumye ikipe ye itahana inota rimwe ryonyine

Nyuma yo gutora agatege Ombolenga Fitina (ibumoso) na Buregeya Prince berekeje mu rwambariro baganira ku bibabayeho

Nsabimana Eric ni we wakuye Kimenyi Yves mu izamu amwerekeza mu rwambariro

Ntwali Evode waguzwe na APR FC imukuye muri AS Kigali na we yihanganishijwe n'umutoza wungirije w'iyi kipe, Nshutiyamagara Ismael Kodo nyuma yo kunganya ibitego 2-2

Umutoza Mukuru wa APR FC wijunditswe na bamwe mu bafana, Zlatko Krmpotić yambukiranya ikibuga yerekeza mu rwambariro nyuma y'umukino

Butera Andrew yatunguwe no kunganya na AS Kigali

Na Imran Nshimiyimana ntiyabyumvaga

Nsabimana Eric ''Zidane'' yasohotse mu kibuga afashe ku bitugu bya Lague wari wakuyemo inkweto

Amafoto: Ntare Julius