Ku wa Kane, tariki ya 1 Ukwakira 2026, ni bwo kuri hoteli ya FERWAFA hateraniye inama ya Komite Nyobozi, igamije gufata umwanzuro ku gihe cyo kuzuza imyanya yayo by’umwihariko uwa Perezida wayo.

Inama yemeje ko muri Mutarama 2027, ari bwo hazatorwa Perezida wa FERWAFA mushya, hanemezwa ko Gasarabwe wari Visi Perezida wa mbere ushinzwe Imari n’Ubutegetsi akomeza kuba Perezida w’Agateganyo.

Itariki ndetse n’aho amatora azabera binyuze mu Nama y’Inteko Rusange Idasanzwe, bizatangazwa nyuma.

Shema yeguye ku mwanya yari yatorewe nyuma y’amezi 13 gusa ayoboye, binyuze mu ibaruwa yanditse ku wa 29 Nzeri 2026, kandi icyemezo cye gihita gishyirwa mu bikorwa ako kanya.

Shema yahagaritse izi nshingano nyuma y’ukwezi n’igice ari mu manza zirebana n’imirimo asanzwe akora hanze y’umupira w’amaguru, aho yaregwaga icyaha cyo gutanga sheki zitazigamiwe n’icyo kwihesha ikintu cy’undi hakoreshejwe uburiganya.

Ni ibyaha yakoze mu bucuruzi bw’ibijyanye n’ibikoresho by’ubuvuzi asanzwe akora binyuze mu kigo cye cya Africa Medical Supplier.

Mu mategeko ngengamikorere ya FERWAFA ndetse no mu bisabwa abiyamamariza kuyobora uru rwego, hagaragazwa ko uri mu mwanya wo kuyobora iri Shyirahamwe agomba "kuba atarigeze ahamwa n’icyaha agafungwa birenze amezi atandatu.” Igihano yakatiwe gituma atakaza ubunyangamugayo.

Amatora ya FERWAFA ateganyijwe muri Mutarama 2027

Shema Fabrice yeguye ku mwanya wa Perezida wa FERWAFA

Gasarabwe Claudine yemejwe nka Perezida w'Agateganyo wa FERWAFA