Uyu mukino wabereye kuri Stade Mpuzamahanga ya Huye, kuri iki Cyumweru, tarikiya 27 Ugushyingo 2022.

Ni umukino wagiye kuba amakipe yombi aheruka kunganya imikino yayo yabanje aho Mukura Victory Sports et Loisirs yanganyije na Rayon Sports 2-2 tariki ya 20 Ugushyingo kuri Stade ya Kigali mu gihe APR FC yaguye miswi na Kiyovu Sports ibitego 2-2 tariki 23 Ugushyingo 2022 na yo kuri Stade ya Kigali.

Uyu mukino ikipe ya Mukura VSL ntiyari ifite bamwe mu bakinnyi basanzwe babanza mu kibuga bitewe n'amakarita barimo Kapiteni Ngirimana Alexis, Murenzi Patrick na Kamanzi Ashraf.

Ibi byatumye ibanza abakinnyi batanu gusa ku ntebe y'abasimbura mu gihe APR FC yo yari ifite abakinnyi bayo bose.

Umukino watangiye amakipe yombi asa nk'ayigana dore ko iminota 20 yarangiye nta kipe ibashije gutera ishoti mu izamu ry'indi.

Mukura VS yatangiye umukino ikinira inyuma, APR FC ikagerageza gukoresha impande zayo ishaka ibitego aho Byiringiro Lague yagerageje uburyo bubiri ariko umunyezamu wa Mukura VS, Umunya-Uganda Sebwato Nicholas akamubera ibamba.

Ni na ko Niyibizi Ramadhan yamanukiraga ku ruhande rw'iburyo ariko abakinnyi nka Mugunga Yves uburyo babonaga ntibabashe kububyaza umusaruro.

Ku munota wa 40 w'umukino, APR FC yakoze impinduka Nsengiyumva Irshad asimburwa na Manishimwe Djabel wari ugarutse avuye mu bihano yahawe tariki 14 Ukwakira 2022 ariko ntacyo yaje guhindura n'ubundi iminota 45 irangira amakipe yombi anganya 0-0.

Mu gice cya kabiri amakipe yombi yagerageje gukora impinduka aho APR FC yinjije abakinnyi nka rutahizamu Nshuti innocent, Mugisha Gilbert wacaga imbere ku ruhande rw'ibumoso mu gihe Mukura VS yinjizaga Iradukunda Elie na Zubel.

Mu munota wa 80 w'umukino, APR FC yabonye uburyo bukomeye ku mupira wari uvuye muri koruneri utewe na Omborenga Fitina ariko umunyezamu Sebwato Nicholas awukuramo.

Iminota 90 yarangiye amakipe anganya 0-0, ndetse no mu minota ine yongeweho nta cyahindutse kuko umukino warangiye ari 0-0.

Uyu mukino nta kinini wahinduye ku rutonde rwa shampiyona kuko APR FC yakomeje kuba iya gatatu n'amanota 19 ikurikiye Rayon Sports ya mbere na 22 na Kiyovu Sports ya kabiri na 21.

Mukura Victory Sports yo yazamutse ijya ku mwanya wa cyenda n'amanota 14, izigamye ibitego bibiri.

Amafoto: Ntare Julius