Ni umukino wahuje amakipe abiri atarahiriwe n’umunsi wa mbere kuko APR FC yatsinzwe na AS Kigali 1-0; Etincelles FC itsindwa na Rayon Sports 2-0.

Ikipe ya APR FC yari yakoze impinduka nyinshi mu mukino wayihuje na Etincelles FC yawusoje yanditse amateka yo gutsinda ibitego bine, iba iya mbere itsinze byinshi kuva iri rushanwa ryatangira mu 2016.

Irushanwa ry’Intwari riri kuba ku nshuro ya kane, ritegurwa n’Urwego rw'Igihugu rushinzwe Intwari z'Igihugu, Imidari n'Impeta by'Ishimwe (CHENO) ku bufatanye n’Ishyirahamwe ry’Umupira w’Amaguru mu Rwanda (Ferwafa).

Uyu mukino watangiye ikipe ya Etincelles FC ibonana neza kurusha APR FC, inagaragaza amashagaga imbere y’izamu ariko ntacyo byatanze.

Umutoza wa APR FC, Mulisa Jimmy, yari yakoze impinduka mu bakinnyi batandatu muri 11 yakoresheje atsindwa na AS Kigali.

Uyu munsi yifashishije abafite uburambe mu marushanwa barimo Rusheshangoga Michel, Imanishimwe Emmanuel, Nshimiyimana Imran, Nshuti Dominique Savio na Buregeya Prince.

Ikipe y’Ingabo z’Igihugu yatangiye umukino ifite inyota yo gutsinda, yahiriwe ku munota wa 28 ubwo Dominique Savio Nshuti yayifunguriraga amazamu.

Yakomeje gusatira cyane, yotsa igitutu ubwugarizi bw’abasore batozwa na Nduhirabandi Abdou Kharim ‘Coka’

APR FC yakomeje guhagarara ku gitego cyayo, iminota 45 y’igice cya mbere iyisoza ikiyoboye.

Iyi kipe yatangiye igice cya kabiri ikora impinduka mu busatirizi bwayo aho Sugira Ernest yahaye umwanya Mugunga Yves, Evode Ntwari asimbura Nizeyimana Mirafa.

Umutoza Mulisa yahiriwe n’abakinnyi bashya yinjije mu kibuga ndetse ikipe ye itangira gusatira cyane. Ibi byatumye Etincelles yotswaga igitutu na yo isimbuza Muhanuka Eric hinjira rutahizamu Hatungimana Yannick ngo ayifashe kwishyura.

Ntihaciye iminota myinshi kuko ku wa 65, Muhadjiri Hakizimana yatsinze igitego cya kabiri cya APR FC ku ishoti rikomeye, umunyezamu wa Etincelles Mbarushimana Emile atora umupira mu rushundura.

Uyu mukinnyi uri mu bagenderwaho muri APR FC yasimbujwe Iranzi Jean Claude mu kumuruhutsa ngo yitegure umukino wa nyuma uzahuza ikipe ye na Rayon Sports ku wa Gatanu tariki 1 Gashyantare 2019. Uyu mukino uzabera kuri Stade Amahoro saa 18:00, uzabanzirizwa n’uwa AS Kigali na Etincelles saa 15:30.

Ibintu byazambye cyane kurushaho ku ruhande rwa Etincelles ubwo yatsindwaga ibitego bibiri bikurikirana. Mugunga Yves yatsinze igitego cya gatatu ku munota wa 76, gikurikirwa n’icya kane myugariro Akayezu Jean de Dieu yitsinze ku wa 77.

Umutoza Jimmy Mulisa akomeje kuruhutsa abakinnyi azakenera mu mukino wa nyuma w'iri rushanwa azahanganamo na mukeba Rayon Sports. Butera Andrew yaje gusimburwa na Nkinzingabo Fiston

APR FC iri ku mwanya wa mbere w’agateganyo muri iri rushanwa n’amanota atatu n'ibitego bitatu izigamye. Ni mbere y’umukino wa kabiri uhuza Rayon Sports na AS Kigali watangiye saa 18:00.

Ikipe izegukana irushanwa izahembwa miliyoni 4Frw n’igikombe, iya kabiri izahabwa miliyoni 2 Frw, mu gihe iya gatatu izahabwa 1,5 Frw, iya nyuma igatahana 1Frw.

Rayon Sports niyo ifite Igikombe cy’Irushanwa ry’Intwari riheruka yegukanye ku bitego yari izigamye nyuma yo gutsindwa na APR FC ibitego 2-1 ku wa 1 Gashyantare 2018.

Igikombe cy'Intwari gifite insanganyamatsiko ikangurira abanyarwanda gukomeza ubutwari mu cyerekezo cy'u Rwanda
Igikombe cy'Intwari gifite insanganyamatsiko ikangurira abanyarwanda gukomeza ubutwari mu cyerekezo cy'u Rwanda
Ntabwo wari umunsi mwiza kuri Mbarushimana Emile, umunyezamu Etincelles FC yavanye muri Musanze FC
Ntabwo wari umunsi mwiza kuri Mbarushimana Emile, umunyezamu Etincelles FC yavanye muri Musanze FC
Ruhago si intambara, mbere y'umukino abatoza bombi baramukanyije mu mahoro
Ruhago si intambara, mbere y'umukino abatoza bombi baramukanyije mu mahoro
Umukino wayobowe n'umusifuzi mpuzamahanga w'umugore, Mukansanga Salma
Umukino wayobowe n'umusifuzi mpuzamahanga w'umugore, Mukansanga Salma
Mu gihe yari ategereje ikipe ye, Rwarutabura yari inyuma ya Etincelles FC yanyagiwe na APR FC
Mu gihe yari ategereje ikipe ye, Rwarutabura yari inyuma ya Etincelles FC yanyagiwe na APR FC
APR FC yazanye intego yo gushaka ibitego byinshi byayifasha mu gihe yasoza irushanwa inganya amanota n'indi kipe
APR FC yazanye intego yo gushaka ibitego byinshi byayifasha mu gihe yasoza irushanwa inganya amanota n'indi kipe
Abakinnyi 11 ba Etincelles FC bahagaze nabi banyagirwa na APR FC
Abakinnyi 11 ba Etincelles FC bahagaze nabi banyagirwa na APR FC
Michel Rusheshangoga nyuma yo kumara amezi atandatu adakina ku ruhande rw'iburyo yongeye kuhakoreshwa
Michel Rusheshangoga nyuma yo kumara amezi atandatu adakina ku ruhande rw'iburyo yongeye kuhakoreshwa
Muhadjiri Hakizimana yahanganaga na Etincelles FC yazamukiyemo
Muhadjiri Hakizimana yahanganaga na Etincelles FC yazamukiyemo
Muhadjiri Hakizimana yakorewe amakosa inshuro nyinshi
Muhadjiri Hakizimana yakorewe amakosa inshuro nyinshi
Umusifuzi yakoze akazi ke nta nkomyi
Umusifuzi yakoze akazi ke nta nkomyi
Inshuro nyinshi ntabwo abakinnyi ba Etincelles FC bishimiraga imyanzuro y'umusifuzi Mukansanga
Inshuro nyinshi ntabwo abakinnyi ba Etincelles FC bishimiraga imyanzuro y'umusifuzi Mukansanga
Igitego cya mbere cyinjijwe na Savio Nshuti
Igitego cya mbere cyinjijwe na Savio Nshuti
Muhadjiri atera ishoti ryavuyemo igitego cya kabiri
Muhadjiri atera ishoti ryavuyemo igitego cya kabiri
Sugira Ernest nubwo atatsinze igitego yagoye ba myugariro ba Etincelles FC
Sugira Ernest nubwo atatsinze igitego yagoye ba myugariro ba Etincelles FC
Tuyisenge Hakimu wazamukiye mu ishuri rya ruhago rya Ferwafa ari mu bakinnyi ba Etincelles FC bagerageje kwitwara neza
Tuyisenge Hakimu wazamukiye mu ishuri rya ruhago rya Ferwafa ari mu bakinnyi ba Etincelles FC bagerageje kwitwara neza
Wari umunsi mwiza kuri APR FC
Wari umunsi mwiza kuri APR FC
Akayezu Jean de Dieu yagize igihunga asubiza umupira ku munyezamu ashiduka yitsinze igitego cya kane cya APR FC
Akayezu Jean de Dieu yagize igihunga asubiza umupira ku munyezamu ashiduka yitsinze igitego cya kane cya APR FC

Amafoto: Ntare Julius