Mu bakinnyi APR FC yitwaje harimo Abanya-Cameroun bane aribo Amadou Kada Moussa, Abdouramane Alioum, Aboubacar Moussa na Souley Sanda. Aba bakinnyi bose bari mu igeragezwa kugira ngo harebwe neza urwego rwabo mbere yo guhitamo abeza.

Abandi bashya yajyanye na bo harimo Kategaya Elie ndetse na Mbonyumwami Taiba baherutse kongerwamo.

Nubwo harimo abakinnyi bashya ariko, muri iyi kipe ntihagaragayemo Fitina Omborenga wahagaritswe ndetse akanamburwa inshingano zo kuba kapiteni, Bizimana Yannick, Ndikumana Danny n’Umunya-Uganda Taddeo Lwanga ukina hagati mu kibuga uherutse kugira ibyago byo gupfusa se umubyara.

Rutahizamu Nshuti Innocent uzajya mu igeragezwa muri Leta Zunze Ubumwe za Amerika na we ntari mu bakinnyi batanzwe.

Col Karasira Richard yavuze ko bamwe “basizwe kubera impamvu z’uko basabye kongererwa ibiruhuko abandi bagorwa n’umubare w’abo twagombaga kujyana cyane ko bo tubazi bagombaga guha umwanya abo tugiye kureba.”

Yakomeje avuga ku ntego zijyanye iyi Kipe mu marushanwa ya Mapinduzi Cup ariko ahanini ikigenderewe ari ukugerageza abakinnyi bashya.

Ati “Imwe mu ntego dufite ni ukwitwara neza tukagera kure hashoboka byanadukundira kandi n’igikombe tukaba twanagitwara. Indi ni uko kubona imikino myinshi bifasha abakinnyi bacu kumenyerana bakaguma no mu mwuka mwiza. Ibyo bidadufasha mu mikino y’imbere mu gihugu ndetse no muri Nyafurika iri mu mezi atandatu ari imbere.”

“Hari imyanya ine dukeneye kongeramo abakinnyi kugira ngo ikipe yuzure. Niba mwarabibonye hari ikibazo cyo guhuzagurika tubona ko ari ngombwa ko iyo myanya ine yakuzuzwa. Uretse Abanyarwanda babiri dufite n’abandi bavuye Cameroun ari bane tuzahitamo babiri muri bo bitewe n’abo umutoza azahitamo.”

Yongeyeho APR FC mu mikino ibanza ya Shampiyona yitwaye neza mu Bwugarizi ariko mu busatirizi byari bigoye kuburyo habonetse ba rutahizamu bashya byagira impinduka ku ikipe.

Muri iri rushanwa, APR FC iri mu itsinda rya Kabiri (B) hamwe na Simba SC, Jamhuri na Singida Fountain Gate isanzwe ikinamo Umunyarwanda Meddie Kagere.

Amafoto: Ntare Julius