Amakuru agera kuri IGIHE nuko iyi kipe yamaze gusezerera abakinnyi icyenda barimo Ndoli Jean Claude, Iradukunda Bertrand, Nshutinamagara Ismaël ‘Kodo’, Bukebuke Yannick, Ntamuhanga Tumaine ‘Tity’, Ndahinduka Michel ‘Bugesera’, Mugenzi Bienvenu, Ssentongo Seifi (uzwi nka Ruhinda Farouk), Mubumbyi Bernabé na Ninahazwe Fabrice.
APR FC ifashe iki cyemezo cyo gusezerera bamwe mu bakinnyi yari isanganywe nyuma yo gusinyisha abandi barimo umunyezamu Mvuyekure Emery, Habyarimana Innocent na Imran Nshimiyimana bavuye muri Police FC, Itangishaka Blaise na myugariro Nsabimana Aimable bavuye muri Marines ndetse na Imanishimwe Emmanuel wavuye muri Rayon Sports.
Nshutinamagara Ismaël ’Kodo’ yabwiye IGIHE ko avuye muri APR FC akiyikunze ngo Rubona Emmanuel akimara guhabwa inshingano zo gutoza ikipe byatumye atabona umwanya wo gukina ndetse bikaba biri mu bitumye asezererwa.
Yagize ati “Nari maze igihe kinini mu ikipe ariko bibaye ngombwa ko dutandukana kuko babonye batakinkeneye. Ku bwanjye ndacyari umukinnyi wakina ku rwego rwo hejuru kandi hari amakipe akomeye twatangiye kuvugana, ndashaka kwiyereka abavuga ko narangiye. APR FC ni ikipe yanjye kandi nzahora nyikunda.”
Kodo yavuze ko kuba yari amaze imyaka hafi 10 muri APR FC bidashobora kumubuza kuba igihe yabona ikipe y’umukeba imushaka yayijyamo kuko akazi ke ari ugukina umupira atari ukureba iby’ubukeba.
Ku rundi ruhande, Ndahinduka Michel wari umaze imyaka itatu muri APR FC ndetse wanayifashije kwegukana iibikombe bitatu bya shampiyona yavuze ko yamaze kumenyeshwa ko atakiri umukinnyi w’iyi kipe ariko ategereje ko imuha ibyo imugomba kuko yari akiyifitiye amasezerano y’umwaka.
Yagize ati “Namaze gutandukana na APR FC. Bibaho iyo umukoresha abonye utakimuha ibyo ashaka arakwirukana ariko ntegereje ko nza kwicara n’abayobozi bakampa ibyo bangomba kuko nari nkiri umukozi, noneho tugatandukana neza.”
Ndahinduka utarigeze abona umwanya wo gukina uyu mwaka kubera kwibasirwa n’ imvune za hato na hato yavuze ko ashimira iyi kipe ku mahirwe yamuhaye, akegukana ibikombe bitatu bya shampiyona n’icy’Amahoro avuye mu cyiciro cya kabiri ndetse akanagaragara mu ikipe y’igihugu.
Twagerageje kuvugana n’Umunyamabanga wa APR FC, Kalisa Adolphe Camarade ntibyadukundira.
Aba bakinnyi bagiye bakurikiye, Iranzi Jean Claude na Rwatubyaye Abdul berekeje ku mugabane w’u Burayi, gukina mu ikipe ya MFK Topvar Topoľčany yo mu cyiciro cya gatatu muri Slovakia, umunyezamu Kwizera Olivier wagiye mu ikipe ya Martzburg United yo muri Afurika y’Epfo na Emery Bayisenge ushobora kwerekeza muri Maroc.
TANGA IGITEKEREZO