Ni umukino wabereye kuri Stade y’Akarere ka Bugesera, kuri iki Cyumweru, tariki ya 23 Kanama 2026, mu gihe yitegura gutangira imikino y’ijonjora ryaa mbere rya CAF Champions League.

Kuri iyi nshuro APR FC yakinnye ishaka igitego kandi hakiri kare cyane, dore ko ku munota wa mbere Byiringiro Jean Gilbert yahushije uburyo bwa mbere, ku mupira wari uzamukanye neza na Djibril Oattara.

Ku munota wa gatatu gusa, Ikipe y’Ingabo z’Igihugu yatsinze igitego cya mbere, gitsinzwe na Uwiyaremye Fidali, ku kazi gakomeye kari gakozwe na Mamadou Traore wafashe icyemezo asiga ubwugarizi bwa Al-Ahli Wad Medani.

Uyu mukino werekanye ko Mamadou Traoré ari umwe mu bo APR FC izubakiraho muri uyu mwaka, dore ko imipira myinshi iva mu kibuga hagati ijya kuri ba rutahizamu ari we iturukaho.

Gusa uyu mukinnyi ntaramenyerana na Memel Dao ugikoresha imbaraga nyinshi mu gushaka umupira, ariko myinshi muri yo ntayibyaze umusaruro, bikavamo amakosa menshi ya APR FC mu kibuga hagati.

Umunyezamu wa APR FC, Ernane Siluane, utaragize intangiriro nziza muri APR FC, yagaragaje ko nubwo hari abamushidikanyaho ariko ari umuhanga, kuko yakuyemo imipira ibiri harimo uwa Alex Asho wa Al-Ahli Medani, kandi barebanaga hagati yabo harimo nka metero imwe.

Mu gice cya kabiri, APR FC yakoze impinduka ishyira mu kibuga Hakim Kiwanuka, asimbura Uwiyaremye Fidali, naho Nshimiyimana Yunusu ajyamo havamo Ishimwe Abdoul.

Nshimiyimana Yunusu yinjiraye igihunga, ndetse guhagarara nabi we na bagenzi be barimo Madou Zon, bishyurwa igitego cya mbere cyatsinzwe na Mohamed Hashm Takat wateye ishoti ahagaze wenyine.

Iki gitego kandi cyagiyemo mu gice cya kabiri cyagizwemo uruhare n’imbaraga nke za Byiringiro Gilbert, wasizwe na rutahizamu wa Al-Ahli Wad Medani, Moaz Al-Bakhakh.

Impinduka umutoza wa APR FC yakoze zo gushyira mu kibuga Rubuguza Jean Pierre, Daouda Yussif na Omborenga Fitina, byongereye imipira ya APR FC igana mu rubuga rw’amahina rwa Al-Ahli Wad Medani, iza no kubona igitego ku munota wa 74 cyashyizwemo na Rubuguza.

APR FC iracyahuzagurika mu bwugarizi bwayo, dore ko amakosa ya Nshimiyimana Yunusu, Byiringiro Gilbert na Ishimwe Christian yatezaga ibibazo inshuro nyinshi ku izamu rya APR FC.

Bigaragara ko ari ikibazo cy’igihe, kuko abakinnyi biganjemo abashya bataramenyerana n’abasanzwe mu ikipe, kandi Umutoza wa APR FC, Abderrahim Taleb, na we asa nk’utaremeza neza abakinnyi babanza mu kibuga ari ngenderwaho mu ikipe.

Abafana b’Ikipe y’Ingabo basigaye ari bake ku kibuga ugereranyije n’abasanzwe bayiherekeza, ndetse ni ko byari bimeze kuri uyu mukino yari yakiriye.

Uyu mukino wasize umwe mu bana bigishirizwa umupira w’amaguru mu irerero rya APR FC, aguye igihumure ari ku kibuga, ariko imbangukiragutabara yahabaye, ahabwa ubutabazi bw’ibanze.

Uyu wari umwe mu mikino yo kwitegura CAF Champions League, dore ko umukino wayo wa mbere na uteganyijwe ku wa 5 Nzeri 2026, i Kinshasa muri Repubulika Iharanira Demokarasi ya Congo (RDC).

Gusa mbere y’uko ikina uyu mukino, ishobora gukina undi mukino umwe wa gicuti n’ikipe ikomeye kugira ngo irusheho kumenyerana no kwitegura uyu mukino mpuzamahanga.

Abatoza ba APR FC bagera kuri Stade ya Bugesera

Ubwo imodoka itwara abakinnyi ba APR FC yageraga muri stade aho yakiniye umukino wa gicuti

Amakipe yageze ku kibuga yatinze bituma umukino ukererwaho

Ronald Ssekiganda wa APR FC ari kwishyushya

Abakinnyi ba Al-Ahli Wad Medani bishyushya

Abakunzi ba APR FC bagerageje kuyishyigikira

Mutako Sonia umenyerewe muri sinema y'u Rwanda no ku mbuga nkorayambaga yashyigikiye APR FC yihebeye

Umutoza wa Al-Ahli Wad Medani, Awwad Allah, n'uwa APR FC, Abderrahim Taleb baganira mbere yo gukina

Abakinnyi 11 Al-Ahli Wad Medani yabanje mu kibuga

Abakinnyi 11 APR FC yabanje mu kibuga

Ba kapiteni b'amakipe yombi nyuma yo guhabwa amabwiriza y'umukino

Uwiyaremye Fidali yatsinze igitego cya mbere cya APR FC

Djibril Ouattara wa APR FC ni umwe mu bagize ubusatirizi bwayo

Ingabo z'Igihugu zashyigikiye APR FC ikina na Al-Ahli Wad Medani

Mutako Sonia ashyigikiye APR FC

Umurindi wari wose ku Ngabo z'Igihugu zari zishyigikiye ikipe yabo

Chairman w'agateganyo wa APR FC, Col (Rtd) Vincent Mugisha, akurikiye umukino

Umwe mu bana batora imipira yikubise hasi ajyanwa mu mbangukiragutabara

Djibril Ouattara wa APR FC agerageza gusiga ba myugariro ba Al-Ahli Wad Medani

Al-Ahli Wad Medani yananiwe kwikura imbere ya APR FC

Mamadou Traoré yafashije APR FC gutsinda Al-Ahli Wad Medani

Memel Raouf Dao wa APR FC ashaka gutanga umupira kuri bagenzi be

Abafana ba APR FC bakuye akanyamuneza i Bugesera

Abafana b'inkoramutima za APR FC biyemeje kuyiba hafi mu bihe byose

Amafoto: Nzayisingiza Fidele
Video: Ndacyayisenga Emmy