Arsenal yijajaye naho Mourinho akorwa mu jisho

00:00:00 IGIHE NETWORK

KINYARWANDA

ENGLISH

FRANCAIS

Arsenal yijajaye naho Mourinho akorwa mu jisho

Yanditswe na

Tity Thierry Kayishema

Kuya 17 August 2015 saa 02:27

Yasuwe :

Yavuzweho:

Nyuma y’icyumweru cy’umwuka mubi hagati y’umutoza wa Chelsea Jose Mourinho n’umuganga Eva Carneiro, Manchester City yamutunguje ibitego 3-0 iyobora shampiyona mu gihe Arsenal ya Wenger yabonye intsinzi ya mbere bakina na Crystal Palace.

Ni umukino umutoza Mourinho yagiye gukina nyuma y’aho kuwa Gatandatu yirukanye umuganga Eva Carneiro kongera kuvura abakinnyi kuko yinjiye mu kibuga kuvura Eden Hazard adahawe uburenganzira n’umusifuzi mu gihe bari babonye ikarita y’umutuku ya Thibaut Courtois banganya na Swansea City 2-2.

Rutahizamu wa Manchester City, Sergio Aguero yabanje kugerageza inshuro eshatu umunyezamu wa kabiri wa Chelsea Asmir Begovic mbere yo gutsinda igitego ku munota wa 31 acenze ba myugariro batatu ba Chelsea.

Bavuye mu kiruhuko, Mourinho yatunguranye akuramo kapiteni John Terry aha umwanya Kurt Zouma. Ni ku nshuro ya mbere Terry yari asimbuwe mu mukino wa shampiyona kuva muri Gicurasi 2013.

Ku munota wa 79, ku mupira wavuye muri koroneri utewe na David Silva, kapiteni wa Manchester City Vincent Kompany yatsinze igitego cya kabiri n’umutwe, igitego cye cya kabiri mu mikino ibiri ikurikirana.

Eden Hazard wari witezweho byinshi ku ruhande rwa Chelsea yibuze muri uyu mukino maze ku munota wa 85, Silva ahereza umupira Fernandinho watereye ishoti inyuma y’urubuga rwa Chelsea atsinda Begovic igitego cya gatatu.

Byasabye ko Chelsea itegereza umunota wa 70 ngo itere ishoti rya mbere mu izamu rya Joe Hart.

Ni ku nshuro ya gatatu, Mourinho atsinzwe ibitego byinshi muri shampiyona y’u Bwongereza, iyi kipe yatwaye igikombe cya shampiyona yaherukaga gutsindwa imikino yombi ibanza ya shampiyona mu 1998-1999.

Ku munsi wa gatatu wa shampiyona, Chelsea izasura West Bromwich Albion tariki ya 23 Kanama naho Manchester City ijye kwa Everton.

Arsenal yari yatsinzwe umukino ubanza wa shampiyona na West Ham ibitego 2-0 yakoze iyo bwabaga itsinda Crystal Palace ibitego 2-1.

Mbere y’uko Olivier Giroud atsinda igitego ku munota wa 16 aherejwe na Mesut Ozil, Alexis Sanchez yari yateye amashoti atatu mu izamu agarurwa.

Nyuma y’iminota 12 Arsenal ibonye igitego, Joel Ward yakigomboye ku ishoti yatereye inyuma y’urubuga rw’umunyezamu Petr Cech.

Iyi kipe itozwa na Alan Pardew yokeje igitutu Arsenal, Connor Wickham atera umupira wakubise umutambiko w’izamu mbere y’uko umutwe watewe na Alexis Sanchez winjizwa neza na myugariro wa Palace, Damian Delaney.

Umutoza wa Arsenal, Arsene Wenger avuga ko uburyo ikipe yitwaye nyuma yo gutsindwa umukino wa mbere bimwereka ko bashobora kugira umwaka mwiza.

Arsenal izakira Liverpool kuwa Mbere tariki ya 24 Kanama 2015 saa tatu z’ijoro mu gihe Crystal Palace izakina na Aston Villa kuwa Gatandatu.

Kuwa Gatanu, Manchester United yari yatsinze Aston Villa igitego 1-0 cya Adnan Januzaj ku munota wa 19, umukino wa kabiri batsinze mbere yo kwakira Newcastle kuwa Gatandatu saa 13.45.

Kuri uyu wa Mbere saa tatu z’ijoro, Liverpool irakira AFC Bournemouth yazamutse mu cyiciro cya kabiri.

Manchester City iyoboye shampiyona n’amanota 6 banganya na Leicester City na Manchester United ya gatatu.