Kuri uyu wa Kabiri tariki 29 Mutarama 2019 nibwo hakinwe iyi mikino y’umunsi wa kabiri aho Rayon Sports yaje guhangana na AS Kigali yahaye umwanya abakinnyi bari mu igeragezwa; Robert Ndatimana na Ndayisenga Kevin, rutahizamu w'Umurundi wavuye muri Jomo Cosmos FC yo mu cyiciro cya kabiri muri Afurika y'epfo.

Umwanzuro wo kubabanza mu kibuga Robertinho yawufashe afatanyije na Wagner do Nascimento Silva ukomoka muri Brésil, umutoza wungirije watangiye akazi muri Rayon Sports.

Ku ruhande rwa Masudi Djuma nta mpinduka yakoze ku bakinnyi 11 yakoresheje ubwo ikipe ye yatsindaga APR FC mu mpera z’icyumweru gishize, ku munsi wa mbere w’igikombe cy’Intwari.

Uyu mukino wabereye imbere y’abafana basaga ibihumbi 10 bari muri Stade ya Kigali, waranzwe no guhererekanya neza kwa AS Kigali mu gice cya mbere aho yashoboraga kubona igitego ku munota wa 30, ariko umusifuzi w’umukino, Ruzindana Nsoro, yemeza ko habayeho kurarira.

Ni ku mupira wazamukanywe neza na Nshimiyimana Ibrahim, acomekera neza Ishimwe Kevin ahita ahindukiza Andre Mazimpaka urindira Rayon Sports, ariko asanga umusifuzi wo ku ruhande Safari Hamissi aba yazamuye igitambaro.

Umutoza Masudi Djuma yasimbuje ku munota wa 42 akuramo myugariro Harerimana Rachid Leon atanga umwanya kuri Nova Bayama wahanganye na Rayon Sports yamwirukanye mu kwezi gushize, ariko ntibyagira icyo bihindura, igice cya mbere kirangira ari 0-0.

Mu gice cya kabiri Rayon Sports yagarukanye imbaraga nyinshi ishaka igitego mu minota ya mbere, bituma AS Kigali ikora amakosa menshi igerageza kugarira, arimo n’iryo ku munota wa 49 Nsabimana Eric Zidane yakoreye Mugisha Gilbert wari winjiye mu kibuga asimbuye Robert Ndatimana.
Yamuserebetse akoresheje amaguru yombi bimuhesha ikarita y’umuhondo ya kabiri bimuviramo ikarita itukura, AS Kigali ikina iminota 41 ari abakinnyi 10 gusa.

Umubare munini w’abakinnyi mu kibuga ntacyo wafashije Rayon Sports kuko yahushije amahirwe menshi yashoboraga kuyihesha ibitego nko ku munota wa 77 n’uwa 79 ku mashoti yatewe na Donkor Prosper Kuka na Sefu Niyonzima Olivier, ariko umunyezamu Bate Shamiru atabara ikipe ye.

Umukino warangiye amakipe yombi anganya 0-0, wongerera AS Kigali amahirwe yo kwegukana igikombe cy’Intwari kuko ubu irasabwa gutsinda Etincelles FC ku munsi wa nyuma w'irushanwa, ikuzuza amanota arindwi.

Abakeba APR FC na Rayon Sports banganyije ku mukino uzasoza iri rushanwa, AS Kigali yahita yegukana igikombe irusha Rayon Sports amanota abiri. APR FC itsinze, Masudi Djuma n’abakinnyi be bagitwara barusha APR FC inota rimwe naho Rayon Sports yo itsinze APR FC byasaba kubara umubare w'ibitego zizigamye kuko yahita inganya na AS Kigali amanota arindwi.

Uko amakipe akurikiranye mu gikombe cy’Intwari

1. Rayon Sports: Amanota 4, izigamye ibitego 2
2. AS Kigali: Amanota 4, izigamye igitego 1
3. APR FC: Amanota 3, izigamye ibitego 3
4. Etincelles FC : Amanota 0, ifite umwenda w’ibitego 6

Amafoto: Ntare Julius