Kuva tariki ya 12 Mutarama kugeza tariki ya 1 Gashyantare 2026, abakinnyi bakomeye ku Isi bari guhatanira rimwe mu marushanwa akomeye ku Isi muri Tennis rya Australian Open.

Kuri uyu wa Gatandatu, tariki ya 24 Mutarama 2026, hari hateganyijwe imikino itandukanye harimo ibera ku bibuga biri imbere mu nzu, indi na yo n’imyitozo bikabera ku bibuga byo hanze.

Ubushyuhe bwazamutse bugera kuri dogere Celsius 40°, bituma ubuyobozi bw’iri rushanwa bumenyesha abakinnyi n’abakunzi b’umukino wa Tennis ko imikino n’imyitozo byose byagombaga kubera hanze bisubitswe.

Imikino yose yagombaga kuba yakererwagaho isaha imwe kugira ngo habanze harebwe icyakorwa mu kwita ku bakinnyi n’abandi bose bari ku bibuga kubera ubushyuhe.

Mbere y’uko iri tangazo risohoka, umukino wari uri guhuza nimero ya kabiri ku Isi, Jannik Sinner, akina na Eliot Spizzirri ukomoka muri Leta Zunze Ubumwe za Amerika.

Uyu mukino waberaga imbere mu nyubako ya Rod Laver Arena, wahagaze iminota 10 kuko ubushyuhe bwari bubaye bwinshi, biba ngombwa ko igisenge gifungwa hakoherezwamo umwuka ukonje.

Imikino yo ku bibuga bidasakaye yahagaritswe kubera ubushyuhe muri Australian Open

Carlos Alcaraz yagize ubushyuhe budasanzwe ubwo yari mu myitozo

Jannik Sinner yagize ubushyuhe budasanzwe bisaba ko bafunga igisenge cya stade

Jannik Sinner yatsinze Eliot Spizzirri