Iri rushanwa rizahuza abakinnyi b'umupira w'amaguru bifuza kugaragaza impano zabo ngo babe bagurwa n'amakipe atandukanye. Bazaba bakubiye mu byiciro byose hatitawe ku myaka, baba abafite amakipe, abatayafite, abakina mu Rwanda ndetse no hanze yarwo.

Kugeza ku mugoroba wo ku Cyumweru, tariki 9 Nyakanga 2023 i Gikondo aho abakinnyi bacumbikiwe hari hamaze kugera abagera kuri 40 mu basaga gato 60 biyandikishije kwitabira iri rushanwa.

Abasigaye biganjemo abo mu bihugu by'Iburengerazuba bwa Afurika nka Cameroun na Côte d'Ivoire batindijwe na gahunda z'indege bategerejwe ku wa Mbere, tariki 10 Nyakanga 2023.

Abakinnyi bamaze kugera mu mwiherero bakomoka mu bihugu birimo u Rwanda, u Burundi, Uganda, Cameroun, Guinée-Bissau, Guinea, Mali, Ghana, Nigeria, Liberia, Zambia na Chad.

Nyuma yo kugera aho bacumbikiwe, barakorerwa ikizamini cy'ubuzima mu gikorwa kiyoborwa n'abaganga basanzwe bakora uyu mwuga mu makipe yo muri Shampiyona y'Icyiciro cya Mbere mu Rwanda, nyuma berecyeze mu myitozo ku kibuga cya Skol mu Nzove gisanzwe gikoreshwa na Rayon Sports.

Iyi myitozo izakorwa iminsi itatu mbere y'uko abakinnyi bazaba batoranyijwe mu makipe ane bazahura mu minsi itatu izakurikiraho kuri Kigali Pelé Stadium kuva ku wa Kane kugera ku wa Gatandatu ari nabwo hazatangwa ibihembo ku ikipe yahize ayandi no ku bakinnyi bazitwara neza.

Amakipe yose uko ari ane azahabwa amazina azakoresha ndetse iya mbere yiswe Liberation Football Club.

Aya makipe azatozwa n'abatoza bane bakuru basanzwe bazwi muri ruhago Nyarwanda ari bo Thierry Hitimana, Kirasa Alain, Gatera Moussa na Kayiranga Baptiste. Uw'abanyezamu azaba ari Higiro Thomas mu gihe Umuganga ari Rugumaho Arsène usanzwe uvura abakinnyi ba AS Kigali.

Iki gikorwa kandi kizitabirwa n'aba-managers bashinzwe gushakira abakinnyi amakipe baturutse mu bihugu bitandukanye bya Afurika ndetse n'abatoza.

Amatike yo kwinjira yashyizwe ku 5000 Frw mu myanya y’icyubahiro, 2000 Frw ahatwikiriye ndetse na 1000 Frw ahadatwikiriye.

Amafoto: Ntare Julius