{Lionel Messi, Neymar na Luis Suarez batsindiye Barcelona ikina na Paris Saint Germain iyobora itsinda F mu gihe Manchester City na Schalke zabonye itike ku mukino wa nyuma wo mu matsinda.}

Itsinda F

{Barcelona 3-1 PSG (Messi (19), Neymar (41), Suarez (77) & Ibrahimovic (15)}

{Ajax 4-0 APOEL Nicosia}

Paris Saint Germain yatangiye neza umukino ihanahana byatumye ku munota wa 15, Zlatan Ibrahimovic atsinda igitego cyahise cyishyurwa na Lionel Messi kuwa 19 ku mupira watewe na Luis Suarez ukambukiranya izamu ku makosa ya ba myugariro, David Luiz na Thiago Silva.

Ni igitego cya 75 muri champions league, Messi arusha Cristiano Ronaldo bitatu, ni igitego cya 8 atsinze muri uyu mwaka mu mikino y’i Burayi.

Neymar yatsinze igitego cya kabiri maze Luis Suarez atsinda icya gatatu, Barcelona iyobora itsinda n’amanota 15 irusha PSG abiri.

Ajax Ajax yanyagiye APOEL Nicosia ibitego 4-0 ibona itike ya Europa League Lasse Schöne yatsinze bibiri, Davy Klaassen (53) na Arkadiusz Milik (74).

Itsinda E

{Roma 0–2 Manchester City (Nasri (60), Zabaleta (86)}

{FC Bayern München 3-0 CSKA Moscow (Muller (pen 18), Rode (84), Gotze (90)}

Manchester City yabonye intsinzi ya mbere mu Butaliyani, ibitego bya Samir Nasri ku munota wa 60 na Pablo Zabaleta kuwa 86 babona itike ya 1/8 cy’irangiza ku nshuro ya kabiri ikurikirana.

Manchester City itari ifite kapiteni Vincent Kompany, Yaya Toure na Sergio Aguero yasabwaga intsinzi i Roma nubwo Bayern Munich yari yatsinze CSKA Moscow ibitego 3-0.

Ni umukino wa kabiri, Manchester City itsinze mu itsinda nyuma y’ibitego 3-2 batsinze Bayern Munich.

Samir Nasri yakinaga umukino wa 50 muri champions league, atsindira iyi kipe igitego cya 50 muri iyi mikino.

Bayern Munich yatsinze umukino wa 5 muri 6 yo mu itsinda, igitego cya Thomas Muller cya 24 muri champions league cyatumye aba rutahizamu w’ibihe byose, Sebastian Rode atsinda icya kabiri na Mario Gotze agashinguracumu.

Bastian Schweinsteiger yakinaga umukino wa mbere nyuma y’imvune yagize mu gikombe cy’Isi muri Nyakanga 2014.

Itsinda G

{Chelsea 3-1 Sporting (Fàbregas (pen 8), Schürrle (16), Obi Mikel (56) & Silva (50)}

{NK Maribor 0-1 FC Schalke 04 (Max Meyer (62)}

Chelsea yatsinze umukino wa kane mu itsinda G, Cesc Fabregas yatsinze icya mbere kuri penaliti ku ikosa ryakorewe Filipe Luiz, Andre Schurrle atsinda icya kabiri ku munota wa 16.

Mu gice cya kabiri, Jonathan Da Silva yishyuyemo kimwe, nyuma y’iminota 5, ku munota wa 54 John Obi Mikel asongamo umupira wari utewe na Fabregas, ni igitego cya mbere Mikel atsinze muri champions league.

Jose Mourinho yahinduye abakinnyi 6 mu ikipe yatsinzwe na Newcastle aruhutsa Willian, John Terry na Eden Hazard.

Schalke itozwa na Roberto Di Matteo watwaye champions league mu 2012 muri Chelsea yasabwaga gutsinda akabona itike, Max Meyer atsinda Malibor igitego ku munota wa 62.

Nibura amakipe ane ahagarariye u Budage yose yakomeje muri 1/8 cy’irangiza.

Vincent Aboubakar yishyuye igitego cya Shakhtar Donetsk cyatsinzwe na Taras Stepanenko, Porto isoza imikino yo mu itsinda idatsinzwe, Atletic Bilbao yatsinze Bate ibitego 2-0 ibona itike ya Europa League.

Tombola ya 1/8 izaba kuwa Mbere

Nta kipe yatombora iyo byari kiumwe mu itsinda cyangwa bava mu gihugu kimwe, imikino ibanza izaba tariki ya 17/18 na 24/25 Gashyantare 2015 iyo kwishyura 10/11 na17/18 Werurwe 2015.

Amakipe ya mbere mu matsinda: Club Atlético de Madrid (Espagne), Real Madrid CF (Espagne, ifite igikombe) AS Monaco FC (u Bufaransa), Borussia Dortmund (u Budage), FC Bayern München (u Budage), FC Barcelona (Espagne), Chelsea FC (u Bwongereza), FC Porto (Portugal)

Amakipe ya kabiri azatombora: Juventus (u Butaliyani), FC Basel 1893 (u Busuwisi), Bayer 04 Leverkusen (u Budage), Arsenal FC (u Bwongereza), Manchester City FC (u Bwongereza), Paris Saint-Germain FC (u Bufaransa), FC Schalke 04 (u Budage), FC Shakhtar Donetsk (Ukraine).