Ni igikorwa cyabaye ku wa Gatatu, tariki 31 Gicurasi 2023 aho Umutoza Ben Moussa yahaye abakinnyi be bose hamwe miliyoni 2 Frw ngo bayagabane nk’agashimwe ko kwitwara neza bagatwara Igikombe cya Shampiyona ya 2022/2023.

Abakinnyi ba APR FC bahawe iri shimwe mu gihe bari kwitegura umukino wa nyuma w’Igikombe cy’Amahoro bazahuramo na Rayon Sports tariki 3 Kamena 2023.

Amafaranga yatanzwe na Ben Moussa azagenerwa abakinnyi gusa uko ari 26 basanzwe mu ikipe aho nibura buri wese azabona agera ku bihumbi 76 Frw.

Iki ni Igikombe cya mbere cya Shampiyona Ben Moussa yegukanye nk’Umutoza Mukuru mu mateka ye nyuma yo gusimbura Erradi Mohammed Adil, uyu watandukanye na APR FC mu Ukwakira 2022 nyuma yo kutemera ibihano byo guhagarikwa ukwezi yari yafatiwe.

Tariki 17 Ukwakira 2022 ni bwo Ben Moussa yafashe ikipe, atangirana na yo ku mukino w’Umunsi wa Karindwi wa Shampiyona.

APR FC yegukanye Igikombe cya Shampiyona ku Cyumweru, tariki 28 Gicurasi 2023 n’amanota 63 n’ibitego 26 izigamye nyuma yo gutsinda Gorilla FC ibitego 2-1, mu gihe Kiyovu Sports zanganyaga amanota gusa izigamye ibitego 17, yo yatsinze Rutsiro FC ibitego 3-1 n’aho Rayon Sports yasoje ari iya gatatu ku rutonde rwa Shampiyona n’amanota 61 yo yatsinze Sunrise FC igitego 1-0.

Shampiyona Ikipe y’Ingabo z’Igihugu yegukanye ni iya 21 mu mateka yayo kuva yashingwa mu 1993.

Ben Moussa yafashije APR FC kwegukana Igikombe cya Shampiyona ya 2022/2023

Ben Moussa watozaga APR FC mu mwaka w'imikino ushize, yahawe akazi ko gutoza Avenir Sportif de la Marsa y’iwabo muri Tunisia