Uyu mukino watangiye saa 18h ikipe ya Rayon Sports yawukinnye yaruhukije bamwe mu bakinnyi basanzwe babanza mu kibuga nka Fabrice Mugheni, na Rutanga Eric biyongera kuri Manishimwe Djabel utakinnye kuko yakoze ubukwe.

Kuba itari ifite aba bakinnyi ntabwo byayibujije kwitwara neza mu mukino wa mbere w’igikombe cy’Intwari kiri guhuza amakipe ane yaje imbere ku rutonde rwa shampiyona y’umwaka ushize, aho yahanganye na Etincelles FC yo mu karere ka Rubavu.

Umukino watangiye Rayon Sports ihererekanya neza cyane ku bakinnyi bayo bakina basatira, Niyonzima Olivier Sefu, Bukuru Christopher na ba rutahizamu babiri, Michael Sarpong na Bimenyimana Bonfils Caleb.

Guhagarara nabi kwa ba myugariro Tuyisenge Hakim na Niyibizi Ramadhan, byabyajwe umusaruro na Bukuru Christopher ku munota wa 14 kusa w’umukino, ahindura umupira arawubarenza usanga Michael Sarpong ukomoka muri Ghana imbere y’izamu afungura amazamu ku gitego cy’umutwe.

Nyuma y’iki gitego impande zombi zakinnye zitonze bituma nta buryo bwinshi bwo kubona igitego buboneka mu gice cya mbere cyarangiye Rayon Sports iyoboye umukino n’igice kimwe.

Ikipe ya Etincelles FC itozwa na Nduhirabandi Abdul Karim bita Coka yakoze impinduka yinjiza Hatungimana Yannick bavanye muri Inter Stars y’i Burundi mu ntangiriro z’igice cya kabiri.

Bagerageje gushaka igitego cyo kwishyura ariko amahirwe babonye ku munota wa 57 n’uwa 65 ntibwabyazwa umusaruro na rutahizamu Mumbere Saiba Claude wakinaga nka rutahizamu rukumbi w’iyi kipe yo mu karere ka Rubavu.

Etincelles FC yananiwe kubyaza umusaruro amahirwe yabonye bituma Rayon Sports yongera kwigirira icyizere yongera guhererekanya neza.

Ku kazi gakomeye ka Niyonzima Olivier Sefu ku munota wa 76, Rayon Sports yabonye igitego cya kabiri ku mupira Sefu yacomekeye Michael Sarpong ku ruhande rw’iburyo, adahagaritse ahindurira umupira Bimenyimana Bonfils Caleb wakinaga umukino wa nyuma muri Rayon Sports atsinda igitego cya kabiri muri iyi kipe yakiniye kuva mu mpeshyi ya 2017.

Mu minota umunani ya nyuma y’umukino umutoza Robertinho yinjije Kevin Ndayisenga, rutahizamu w’Umurundi uri mu igeragezwa, afata umwanya wa Bukuru Christopher ariko umukino urangira adashoboye gukora ku mupira nyamara yitezweho kubasimburira Caleb mu bihe biri imbere.

Nyuma y’uyu mukino wakurikiranywe n’umutoza wungirije Rayon Sports yavanye muri Brésil, Wagner do Nascimento Silva, rutahizamu Bimenyimana Bonfils Caleb yahise asezera abakinnyi bagenzi be anasezera abafana ba Rayon Sports kuko agiye kwerekeza muri Široki Brijeg iri ku mwanya wa Gatanu muri shampiyona ya Bosnie Herzégovine.

Gahunda y’imikino isigaye mu gikombe cy’Intwari

Kuwa Kabiri tariki 29 Mutarama 2019

· APR FC vs Etincelles FC (Saa 15:30, Stade ya Kigali)

· Rayon Sports vs AS Kigali (Saa 18h, Stade ya Kigali)

Kuwa Gatanu tariki 1 Gashyantare 2019

· Etincelles FC vs AS Kigali (15:30, Stade Amahoro)

· APR FC vs Rayon Sports (18h, Stade Amahoro)

Amafoto: Ntare Julius