Espagne n’u Buholande bakinnye umukino wa nyuma w’igikombe cy’Isi mu 2010 bazacakirana mu mikino yo mu itsinda B, tariki ya 13 Kamena 2014, muri Brazil mu gihe Ubwongereza buri kumwe n’u Butaliyani, Ubudage na Portugal. Umukino ufungura iri rushanwa uzahuza Brazil na Croatia tariki ya 12 Kamena 2014 saa yine z’i Kigali.
Ku mukino wa nyuma wa 2010, Espagne yatsinze Ubuholande igitego 1-0 cya Andreas Iniesta itwara igikombe cya mbere cy’Isi, Espagne yongeye kandi guhura na Chili mu itsinda rimwe.
Hakinwe imikino 820 yo gushaka itike, mu makipe 13 azakina igikombe cy’Isi muri Brazil yari ahari no mucyo mu 1950.
Itsinda D ririmo amakipe 3 yatwaye igikombe cy’Isi,Uruguay, Ubutariyani n’Ubwongereza.
Umutoza wa Leta Zunze Ubumwe z’Amerika, Jurgen Klinsmann wahoze atoza Ubudage, azahura na Joachim Low wari umwungirije, ubu atoza Ubudage.
Argentina na Nigeria bongeye guhurira mu itsinda rimwe nko mu gikombe cy’Isi cyo mu 2002 n’2010.
Abavandimwe Jerome Boateng ukinira Ubudage na Kevin Prince Boateng ukinira Ghana bazahurira mu mikino yo mu itsinda G.
Imikino yo mu matsinda izatangira tariki ya 12 isozwe tariki ya 26 Kamena 2014, hazakomeza amakipe abiri ya mbere, imikino ya 1/16 izakinwa tariki ya 28 Kamena maze umukino wa nyuma ukinirwe kuri Estádio do Maracanã i Rio de Janeiro tariki ya 13 Nyakanga 2014.
Mu bihugu 32 bizakina iri rushanwa, Bosnia Herzegovina nicyo gihugu cyitabiriye bwa mbere imikino ya nyuma y’igikombe cy’Isi, izakina umukino wa mbere tariki ya 15 Kamena 2014 na Argentina.
Imikino y”igikombe cy’Isi ya 2014 izakinirwa mu mijyi 12 yo muri Brazil: mu murwa Brasília, Rio de Janeiro,São Paulo, Fortaleza, Belo Horizonte, Porto Alegre, Salvador, Recife, Cuiabá, Manaus, Natal na Curitiba.
Ubusanzwe, Ishyirahamwe ry’umupira w’amaguru ku Isi (FIFA) ntiryemeraga ko iki gikombe gikinirwa mu mijyi irenze 8, gusa mu 2008 yemeye icyifuzo cya Ricardo Teixeira, umuyobozi wa ruhago ya Brazil, ko imikino yabera mu mujyi myinshi kugira ngo ibi byihsimo bigere ku Banyabrazil benshi.
Ni ku nshuro ya 20 hagiye gukinwa igikombe cy’Isi, ikaba inshuro ya kabiri Brazil yakira iyi mikino nyuma y’1950. Brazil yahawe uburenganzira bwo kwakira iyi mikino mu 2007.
Amerika y’Epfo yaherukaga kwakira iki gikombe mu 1978, muri Argentina. Mu bikombe bine bimaze gukinirwa muri Amerika y’Epfo byose byatwawe n’ikipe ihakomoka.
Uko amakipe ahagaze mu matsinday’igikombe cy’Isi 2014
Itsinda A: Brazil, Croatia, Cameroun, Mexique
Itsinda B: Espagne, Ubuholande, Chile, Australia
Itsinda C: Colombia, Ubugereki, Côte d’Ivoire, Ubuyapani
Itsinda D: Uruguay, Costa Rica, Ubwongereza, Ubutaliyani
Itsinda E: Ubusuwisi, Equateur, Honduras, Ubufaransa
Itsinda F: Argentina, Iran, Nigeria, Bosnia Herzegovina
Itsinda G: Ubudage, Ghana, Leta Zunze Ubumwe z’Amerika, Portugal
Itsinda H: Ububiligi, Algeria, Koreya y’Epfo, Uburusiya
Ibitekerezo bya bamwe mu bakinnyi n’abatoza nyuma ya Tombola
Perezida wa Brazil, Dilma Rousseff uzakira iyi mikino, yavuze ko bishimiye kwakira iki gikombe abizeza umutekano usesuye. Yagize ati “Turifuza ko iki cyaba igikombe cyiza, cy’amateka, twishimiye kwakira amakipe 32.”
Rurangiranwa Pele yibukije Abanyabrazil uko bakuwemo na Uruguay mu 1950 imbere y’abafana maze se akamurira mu maso, ati “Ndizera ko tuzagera ku mukino wa nyuma, sinshaka ko abana babona amarira yanjye.”
Kuri Del Bosque, utoza Espagne ufite iki gikombe, yavuze ko Ubuholande butahindutse cyane kuko bagifite Van Persie, Robben, Van der Vaart na Sneijder. Ati “Ni ingenzi kuri twe gutangirira k’’Ubuholande biradusaba kwitegura neza n’imbaraga, gukina nabo bizadusaba ko tuba turi ku rwego rushimishije.”
Umutoza w’Ubwongereza, Roy Hodgson ngo yisanze mu itsinda ry’urupfu kuko ari kumwe na Uruguay n’Ubutaliyani batagombaga guhurira mu itsinda rimwe. Ati “Ruhago ntikinirwa mu mpapuro, ni abakinnyi 11 ku bandi, hagatsinda uwiteguye neza.”
Carlos Queiroz wahoze atoza Portugal yagize ati “Ni ibyishimo kuba tugiye gukina n’amakipe akomeye ku Isi, ni umwanya wo kwiyerekana no guhamya ubukombe.”
Kuri Didier Deschamps, uyoboye Ubufaransa, ngo icy’ingenzi mu gikombe cy’Isi ni ugutsinda umukino ubanza.
Naho umutoza wa Ghana, Kwesi Appiah ngo ni byiza guhura n’Ubudage ndetse na Leta Zunze Ubumwe z’Amerika batsinze muri 1/16 cy’irangiza mu 2010. Ati”Muzabona gutungurana muri iri tsinda.”
Umwongereza Wayne Rooney uzaba ari kumwe n’Ubutaliyani na Uruguay ya Suarez yagize ati “Niba dushaka kuba aba mbere tugomba gutsinda ab’imbere, turi mu itsinda rikomeye ariko mfite icyizere.”
Gareth Bale, umukinnyi uhenze ku Isi utazakina iyi mikino avuga ko ategereje kureba umukino w’Ubudage na Portugal ndetse na Espagne n’Ubuholande.
Muri iyi tombola herekanwe ku mugaragaro umupira “Adidas brazuca” uzakinwa muri iki gikombe mu gihe igishushanyo gihagarariye iyi mikino, Fuleco, cyerekanywe n’umunyabrazil Marta na Bebeto.
Tombola yayobowe na bamwe mu bihange mu mupira w’amaguru nka
Sir Geoff Hurst, Mario Kempes, Fabio Cannavaro, Lothar Matthaus, Zinedine Zidane, Fernando Hierro, Cafu naAlcides Ghiggia.
Mbere y’uko tombola itangira hafashwe umunota wo kunamira umukambwe Nelson Mandela watabarutse kuri uyu wa Kane, herekanwa filimi ku buzima bwearwanya irondaruhu ndetse n’igihe yitabiraga imikino y’igikombe cy’Isi cya 2010 yabereye muri Afurika y’Epfo.
Gahunda y’iminsi ibiri ya mbere
Kuwa Kane, tariki ya 12 Kamena 2014
Brazil v Croatia- Arena de Sao Paulo 22:00
Kuwa Gatanu, tariki ya 13 Kamena 2014
Mexico v Cameroun- Estadio das Dunas 18:00
Espagne v Ubuholandi- Arena Fonte Nova 21:00
TANGA IGITEKEREZO