Neymar yatsinze ibitego bibiri afasha Brazil kubona amanota atatu ya mbere, iyobora itsinda A mu gihe itegereje umukino uhuza Mexique na Cameroun saa 18.00, nta kipe yakiriye iyi mikino iratsindirwa ku mukino ubanza.

Nyuma yo kotsa igitutu Brazil, myugariro wa Real Madrid na Brazil, Marcelo yananiwe kugarura umupira wari utewe na Olic yitsinda igitego ku munota wa 11. Ni ku nshuro ya mbere mu mateka y’igikombe cy’Isi Brazil yitsinda igitego.

Ku munota wa 26, Neymar yafunguriye abandi bazakina iki gikombe cy’Isi abona ikarita y’umuhondo ku nkokora yari ateye Luc Modric ukinira Croatia na Real Madrid.

Nyuma y’iminota ibiri gusa yahise atsinda igitego cyo kunganya, igitego cya 32 atsindiye Brazil mu mikino 49.

Mu gice cya kabiri, Mateo Kovacic yasimbuwe na Marcelo Brozovic ku ruhande rwa Croatia mu gihe kwa Brazil Hernanes yasimbuye Paulinho.

Ku munota wa 68, Bernard asimbura rutahizamu Hulk wa Brazil ukinira Zenit mu Burusiya.

Brazil yaje kubona penaliti ku munota wa 70 ku ikosa Lovren yakoreye Fred gusa abakinnyi ba Croatia ntibishimira icyemezo cy’umusifuzi w’Umuyapani Yuichi Nishimura ukomoka mu Buyapani, yatewe neza na Neymar. Brazil 2-1 Croatia.

Iki gitego cyatumye Neymar aba rutahizamu wa 7 mu mateka ya Brazil anganya na Jairzinho na Ronaldinho .

Nikica Jelavic asimburwa na Ante Rebic byakurikiwe n’igitego cya Croatia cyanzwe kuko Ivica Olic yasunitse umunyezamu wa Brazil, Julio Cesar.

Habura iminota itatu, Neymar yasimbuwe na Ramires ukina muri Chelsea.

Julio Cesar yaje gukuramo umupira ku munota wa 90 maze Oscar ukinira Chelsea atsinda igitego cya gatatu.

Nyuma y’umukino umutoza wa Croatia, Niko Kovac yavuze ko uretse kubaha igihugu cyabo, bakagombye kuba bavuye mu mukino kubera umusifuzi.

Birasa nk’aho imisifurire ishobora kudafatwa neza muri iyi mikino nyuma ya penaliti ya Fred n’igitego cya Croatia cyanzwe bitanyuze benshi cyane ko byakorewe igihugu cyakiriye.

Yagize ati "Niba ari uku dutangiye igikombe cy’Isi, ibyiza ni uko twasubira mu rugo. Iriya ibaye penaliti ntitwaba tugikina ruhago, mureke twikinire Baskeball wenda, kuko biteye isoni."

Nubwo ari intsinzi ya 10 ikurikirana y’umutoza Luis Felipe Scolari, Brazil ntiyakinnye uko benshi babikega bigendanye n’umukino wa nyuma muri Confederation cup na Espagne.

Ku rubuga rwa Twitter, Umwongereza Gary Lenerker wabafashije kubona umwanya wa kane mu gikombe cy’Isi 1990 yagize ati "Biragoye kuba wabasha gutoranya hagati ya Neymar n’umusifuzi uwafashije Brazil kubona intsinzi."

Naho Fabrice Muamba ati " Nyuma y’ibi, nzatungurwa nongeye kubona uyu musifuzi ahawe undi mukino."

Kuri uyu wa Gatanu

Saa 18.00 Mexique irakina na Cameroun bari mu itsinda rimwe na Brazil na Croatia.

Saa 21.00 Espagne yakire u Buholande, amakipe yahuriye ku mukino wa nyuma w’igikombe cy’Isi cyo mu 2010.

Saa 23.59 Chili irakira Australia kuri Arena Pantanal.

[email protected]