Nyuma yo gutsinda Cameroun ibitego 4-1, Brazil izakina na Chili naho Mexique yatsinze Croatia 3-1 ihure n’u Buholandi muri 1/8 cy’irangiza kuri uyu wa Gatandatu no ku Cyumweru.

Cameroun yasezerewe nyuma yo gutsindwa imikino ibiri ikurikirana yagombaga gukina na Brazil yasabwaga kunganya ikabona itike ya 1/8 cyangwa gutsinda ngo idahura n’u Buholandi bwa mbere mu itsinda A.

Ku munota wa 17, Neymar yatanze icyizere atsinda igitego cya mbere aherejwe umupira na Luis Gustavo mu mukino wa 100 w’igikombe cy’Isi Brazil imaze gukina. Iki igitego cyabaye icya 100 mu gikombe cy’Isi 2014.

Allan Nyom yaje guhereza umupira Joël Matip atsindira Cameroun igitego cya mbere mu gikombe cy’Isi 2014, igitego cya 18 mu gikombe cy’Isi kuva 1982.

Neymar yatsinze icya kabiri ku munota wa 34 umupira watewe mu rubuga rwa Cameroun na Marcelo usanga ahagaze neza atsinda igitego cya kane cyatumye aba rutahizamu w’iyi mikino.

Bavuye kuruhuka, Fred yatsinze igitego cya gatatu umupira watewe na David Luiz ku munota wa 49. Fernandinho wari wasimbuye Paulinho atsinda agashinguracumu ku munota wa 84.

Mu gihe Brazil yari yabonye intsinzi, Mexique yagombaga kwikiranura na Croatia. Ku munota wa 72, Raphael Márquez yatsinze igitego cya mbere. Nyuma y’iminota itatu Andrés Guardado atsinda icya kabiri. Javier Hernández yatsinze icya gatatu mbere y’uko Ivan Perišić atsindira Croatia impozamarira.

Muri 1/8 Brazil izakina na Chili kuwa Gatandatu saa 18.00 kuri Estadio Mineirão naho u Buholandi bwakire Mexique ku Cyumweru saa 18.00 i Castelão.

[email protected]