Mu gihe Neymar yavunitse akava mu gikombe cy’Isi na kapiteni Thiago Silva akaba yarahagaritswe umukino wa ½ cy’irangiza, Brazil irahura n’u Budage ku nshuro ya mbere mu gikombe cy’Isinyuma yo kubatwara igikombe cyo mu 2002.

Brazil vs u Budage saa 22.00 @ Estadio Mineirao, Belo Horizonte

Kubera imvune ya Neymar, umutoza wa Brazil Luiz Felipe Scolari ashobora kumusimbuza Willian cyangwa Bernard mu gihe myugariro, kapiteni Thiago Silva yasimburwa na Dante naho David Luiz akayobora bagenzi be baharanira kugera ku mukino wa nyuma kuri Estádio Maracanã ku Cyumweru.

Scolari avuga ko babuze (Neymar) umukinnyi ufite impano ariko akagira icyizere ko ikipe ye iri bwitange bashaka igitego cyabageza ku mukino wa nyuma, bashaka igikombe cya gatandatu cy’Isi.

Willian na Bernard, umwe araragizwa inshingano Neymar yabaga afite

Kubera ko Thiago yahagaritswe, David Luiz araba kapiteni afatanye na Dante (ubanza ibumoso)

Yagize ati “ Uyu niwo mukino utuganisha ku ndoto tumaranye igihe, ku byifuzo by’abatuye Brazil n’ibyishimo by’ abakunzi bacu muri rusange.”

Zico wakiniye Brazil mu gikombe cy’Isi cyo mu 1982 na 1986 avuga ko kubura kwa Neymar bigomba gutera imbaraga bagenzi be. Ati “ Abakinnyi bagomba kwitanga kubera Neymar wababereye igitambo.”

Mu gihe u Budage bukina ku nshuro ya mbere mu mikino itanu ishize n’ikipe yo muri Amerika y’Epfo, nta kipe y’i Burayi yatsinze imikino itandatu ikurikirana mu bikombe by’Isi byabereye muri Amerika y’Epfo.

Neymar yagize imvune ku mukino wa Colombia asezerwa mu gikombe cy'Isi, yari amizero ya Brazil

Mu guha icyubahiro Neymar abafana ba Brazil barambara amasura ye

Umutoza w’u Budage Joachim Low arahitamo niba abanzamo myugariro wa Arsenal, Per Mertesacker wari waruhukijwe umukino w’u Bufaransa kubera impamvu z’amayeri y’umukino cyangwa se Matt Hummels agakomezanya na Jerome Boateng.

Mu 2002 Brazil ya Scolari yatwaye igikombe cy’Isi itsinze u Budage ibitego 2-0 bya Ronaldo kuri Nissan Stadium i Yokohama mu Buyapani. Umudage Miloslav Klose niwe wenyine usigaye mu kibuga wari muri uyu mukino.

Nyuma yo gutwara igikombe cyo mu 2002 ni ku nshuro ya mbere, Brazil yongeye gukina imikino ya ½ cy’irangiza mu 2014.

Schweinsteiger na Müller barasabwa kuyobora umukino w'Abadage bamaze gatatu bagera muri 1/2

Uyu mukino urasiga Brazil ikinnye imikino 104 n’u Budage 102 mu gikombe cy’Isi myinshi ku ikipe imwe. Brazil yinjije igitego muri buri mu mukino yahuyemo n’u Budage mu nshuro 10.

Brazil yatsindiwe rimwe muri ½ mu 1938 n’u Butaliyani, batsinda gatanu banganya rimwe bakomeza kuri penaliti mu 1998 batsinze u Buholandi.

Neymar wavunitse yagize uruhare rwa 50% mu bitego 10 Brazil yatsinze, yatsinzemo bine atanga umupira wavuyemo ikindi.

Mu 2002: Ronaldo yatsinze Khan ibitego 2-0 batwara igikombe, nibwo baheruka muri 1/2

Miloslave Klose na Scolari nibo bahamya b'ibyabaye mu 2002 basigaye mu kibuga

Nubwo Abadage baciye umuhigo wo gukina ½ cy’irangiza inshuro enye zikurikirana, mu nshuro 11 bakinnye iki gice kibanziriza umukino wa nyuma batsinzwe gatanu, bakomeza kane banganya kabiri, bakomeza yombi kuri penaliti.

Mu mikino itanu bakinnye mu gikombe cy’Isi (2014), u Budage ntibwatsinzwe igitego muri itatu, Algeria na Ghana niyo yabashije kubatsinda igitego.