Nyuma yo kunyagirwa n’u Budage 7-1, Brazil yakiriye igikombe cy’Isi 2014 yifuzaga guhanagura amarira abakunzi bayo, yatsinzwe n’u Buholandi ibitego 3-0 bwegukana umwanya wa gatatu.

U Buholandi bwinjije igitego cya mbere ku munota wa 3 nyuma y’ikosa Thiago Silva yakoreye Arjen Robben, umusifuzi wo muri Algeria, Djamel Haïmoudi atanga penaliti yatsinzwe na Robin Van Persie.

Ku munota wa 17, myugariro wa Brazil David Luiz yagaruye nabi umupira mu rubuga rw’umunyezamu we, ufatwa na Daley Blind wahise atsinda igitego cya kabiri.

Mbere yo kujya kuruhuka, Wijnaldum yatsinze icya gatatu ku mupira yaherejwe iburyo na Janmaat. Mu mikino ibiri ikurikirana Brazil yatsinzwemo ibitego 10 yinjiza kimwe cya Oscar bakina n’u Budage.

Harabura ibitego bibiri ngo iki gikombe cy’Isi (170) gikureho umuhigo w’icyo mu 1998 cyabereye mu Bufaransa cyatsinzwemo ibitego 171.

Ku nshuro ya mbere kuva mu 2002, u Buholandi bwakinnye budafite Wesley Sneijder wavunitse bishyushya mbere y’uko umukino utangira asimburwa na Jonathan De Guzman.

Nubu umutoza wa Brazil, Luiz Felipe Scolari amasezerano ye yarangiranye n’igikombe cy’Isi ntarasezera muri iyi kipe, akaba ategereje umwanzuro w’Ishyirahamwe ry’umupira w’amaguru. Scolari yatwaye igikombe cy’Isi na Brazil mu 2002.

Umunyezamu wa Brazil, Julio Cesar yatangaje ko ari mu marembere yo gusohoka mu ikipe y’igihugu kuko asanga bigoye ko ku myaka 35 yakomeza guhamagarwa cyane ko byagorana gukina igikombe cy’Isi cyo mu 2018.

Ubwo umunyezamu wa Swansea, Michel Vorm yasimburaga Cillessen byatumye ikipe y’abakinnyi 23 b’Abaholandi bagiye mu gikombe cy’Isi bose bavayo bakinnye naho Cillessen aba umunyezamu wa mbere usibujwe abanyezamu babiri na Tim Krul ku mukino wa Costa Rica.

Neymar wavunitse bakina na Colombia, agasiba umukino w’u Budage, yari ku ntebe y’abasimbura areba bagenzi be bongera gutsindirwa imbere y’abafana babo.

Ni ku nshuro ya mbere, u Buholandi buvuye mu gikombe cy’Isi budatsinzwe umukino n’umwe (iminota isanzwe 90).

Uretse Dirk Kuyt, birashoboka ko abandi bakinnyi bari mu ikipe ya Van Gaal bagaruka mu ikipe y’umutoza mushya w’u Buholandi, Guus Hiddink uzatangira muri Nzeli gushaka itike y’igikombe cy’u Burayi 2016. Ni ubwa mbere kuva mu 1940, Brazil itsindiwe imikino ibiri ikurikirana mu rugo mu gihe kandi yananiwe gutsinda igitego mu mikino ibiri kuva mu 1978.

Uyu munsi harakinwa umukino wa nyuma, u Budage bwakire Argentina saa 21.00 kuri Estadio Maracanã.