Perezida wa Cote d’Ivoir, Alassane Ouattara yemeje ko igihe ikipe y’igihugu ya Cote d’Ivoir yaba ibonye itike ya 1/8 cy’irangiza buri mukinnyi yahabwa ibihumbi 38 800 $ (miliyoni 26 n’ibihumbi 694 Rwf) nk’agahimbazamusyi.
Ibi abakinnyi bari babisezeranyijwe kuwa Gatandatu na Guillaume Soro, Perezida w’inteko ishinga amategeko wari muri Brazil areba umukino batsinzwe na Colombia ibitego 2-1.
Soro yavuze ko icy’ingenzi ari ugutera imbaraga abakinnyi ngo bashobore kugera muri 1/8 ku nshuro ya mbere, abasaba kudacika intege abagezaho ubutumwa bwa Perezida Ouattara ko nibatsinda u Bugereki agahimbazamusyi kazikuba kabiri.
Nyuma yo gutsinda u Bugereki buri mukinnyi azahabwa agahimbazamusyi ka miliyoni 16, 4 za CFA. Ku mutoza Sabri Lamouchi agahimbazamusyi ke kazava kuri miliyoni 32, 8 za CFA kagere kuri miliyoni 65, 6 muri 1/8.
Cote d’Ivoir iri ku mwanya wa kabiri mu itsinda C n’amanota 3, izakina umukino wa nyuma wo mu itsinda n’u Bugereki kuri uyu Kabiri.
Cote d’Ivoir irasabwa kunganya n’u Bugereki bwa nyuma muri iri tsinda ngo ikomeze muri 1/8 igihe u Buyapani bwaba budatsinze Colombia. Ku mukino ubanza bari batsinze u Buyapani.
Ubusanzwe abakinnyi ba Cote d’Ivoir bari mu gikombe cy’Isi bemererwa agahimbazamusyi k’ibihumbi $24 400 kuri buri mukino igihe batsinze.
Mu gihe muri Cameroun abakinnyi bari banze kujya muri Brazil batarabona agahimbazamusyi, muri Gicurasi Leta ya Cote d’Ivoir yatoye ingengo y’imari ya miliyari 15, 4 za CFA igenewe ikipe y’igihugu yagombaga kwitabira igikombe cy’Isi.
Muri yo harimo miliyari 3, 5 za CFA yatanzwe na Leta naho miliyari 11, 8 za CFA zitangwa n’Ishyirahamwe ry’umupira w’amaguru rya Cote d’Ivoir.
Cote d’Ivoir igeze muri ¼ cy’irangiza buri mukinnyi yahabwa miliyoni 19, 6 CFA, muri ½ babona miliyoni 32, 8 CFA. Igihe baba batwaye iki gikombe buri mukinnyi wa Cote d’Ivoir yabona agahimbazamusyi ka miliyoni 131 za CFA.
TANGA IGITEKEREZO