Itangazo ryashyizwe hanze na Premier League ku wa Mbere, ryagaragaje ko ibipimo 15,186 byafashwe hagati ya tariki ya 20 n’iya 26 Ukuboza 2021, byabonetsemo abarwayi 103 ba COVID-19.

Ni ku nshuro ya mbere muri Premier League habonetse umubare ungana gutyo kuko mu cyumweru cyari cyabanje, hari habonetse abarwayi 90.

Kuri ubu, muri iyi Shampiyona ikinwa n’amakipe 20, abayagize bose bapimwa buri munsi bitandukanye n’inshuro ebyiri mu cyumweru nk’uko byakorwaga mbere y’ibyumweru bibiri bishize.

Kuzamuka k’umubare w’ubwandu bwa COVID-19 muri aya makipe bimaze gutuma imikino 15 isubikwa muri uku kwezi k’Ukuboza.

Premier League n’amakipe yo mu byiciro byo hasi, biherutse kwemeza ko imikino yo mu minsi mikuru yose ikinwa uko yapanzwe nubwo COVID-19 ikomeje gukaza umurego.

Buri kipe yabwiwe ko ishobora gukina mu gihe ifite abakinnyi 13 bazima n’umunyezamu umwe kugira ngo hirindwe ko ibirarane byaba byinshi.

Manchester United yari imaze ibyumweru bibiri idakina kubera COVID-19, yaraye inganyije na Newcastle United igitego 1-1.

Umukino wari guhuza Arsenal na Watford n’uwari guhuza Aston Villa na Leeds United kuri uyu wa Kabiri, yombi yasubitswe kubera ubwandu bwinshi bukomeje kugaragara muri Watford na Aston Villa.