Muri uyu mukino waberaga mu Mujyi wa Seville muri Espagne, Joe Aribo ukinira Rangers yafunguye amazamu ku munota wa 57 mbere y’uko Rafael Santos Borré yishyura ku munota wa 69.

Amakipe yombi yarangije iminota 90 y'umukino anganya igitego 1-1 ndetse indi 30 y'inyongera yitabajwe na yo ntacyo yatanze.

Bageze muri penaliti, abakinnyi ba Eintracht Frankfurt babashije kwinjiza eshanu mu gihe Rangers bateye neza enye; Aaron Ramsey winjiye mu kibuga ku munota wa 119 ni we wayihushije.

Umukino waberaga kuri Ramon Sanchez-Pizjuan Stadium wasize Frankfurt iri imbere mu gutera amashoti kuko yasoje ifite 22 arimo ane agana mu izamu.

Rangers yo yateye amashoti 14 arimo atandatu agana mu izamu. Buri ruhande rwabonye ishoti rimwe ryavuyemo igitego.

Uyu mukino wavugishije Isi ya ruhago bitewe n’uburyo abafana ku mpande zombi by’umwihariko aba Franfurt bafana banacana imiriro muri stade.

Kuva yashingwa mu 1899, Eintracht Frankfurt yaherukaga gutwara irushanwa nk’iri mu mwaka w’imikino 1979-1980, imyaka 42 yari ishize itarongera kubigeraho.

Eintracht Frankfurt yakoze agashya ko kuba yatwaye iki gikombe idatsinzwe nk’uko byakozwe na Chelsea FC mu 2019 kimwe na Villarreal umwaka ushize wa 2021.

Mu rugendo rwa Eintracht Frankfurt hari harimo amakipe akomeye yahigitse nka FC Barcelone, West Ham United na Real Betis.