Nyuma yo gusezerera Free State Stars, yo muri Afurika y’Epfo na Hilal El Obeid yo muri Sudan, ikipe ya Mukura Victory Sports yo mu karere ka Huye, igeze mu ijonjora rya gatatu aho isabwa gusezerera ikipe imwe igahita iba ikipe ya kabiri yo mu Rwanda, igeze mu matsinda y’irushanwa rya CAF, rihuza amakipe yatwaye ibikombe by’ibihugu iwayo.

Mu ijoro ryakeye nibwo amakipe 32 asigaye muri iri rushanwa yamenye uko azahura muri 1/16, Mukura VS yisanga igomba kubanza gusura Al hilal Omdurman, ikipe y’ubukombe mu gihugu cya Sudan.

Iyi kipe yashingiwe mu Mujyi wa kabiri ukomeye muri iki gihugu kinini kurusha ibindi muri Afurika, Umujyi wa Omdurman, tariki 13 Gashyantare 1930.

Yakirira imikino yayo kuri ‘Al-Hilal Stadium’ yakira abantu ibihumbi 62,000 yatashywe ku mugaragaro tariki 26 Mutarama 1968 mu mukino wa gicuti wahuje Al Hilal n’ikipe y’igihugu ya Ghana yari mu bihe byiza icyo gihe, amakipe yombi anganya 1-1.

Al hilal Omdurman yambara ubururu n’umweru, ni imwe mu makipe afite ibigwi bikomeye kurusha andi muri Afurika bituma biyita abayobozi b’umupira w’amaguru wa Afurika.

Mu mateka y’iyi kipe, imaze kwegukana ibikombe bya shampiyona ya Sudan inshuro 27, ibikombe by’igihugu inshuro zirindwi. Mu marushanwa mpuzamahanga, yageze ku mukino wa nyuma wa CAF Champions League inshuro ebyiri 1987 na 1992 gusa ntabwo irashobora kwegukana iki gikombe.

Niyo kipe ikunzwe kurusha izindi muri Sudan kandi abafana bayo bari mu bihe byiza kuko yegukanye ibikombe bya shampiyona bitatu byose biheruka 2016, 2017 na 2018. Mu marushanwa ya CAF kure iheruka kugera ni muri ½ cya Champions League mu 2015.

Umutoza Lamine N'Diaye ukomoka muri Sénégal, uyitoza ni umwe mu batoza bafite inararibonye mu mupira wa Afurika kuko yatoje andi makipe akomeye kuri uyu mugabane nka; Mulhouse yo muri Sénégal, Coton Sport yo muri Cameroun, Maghreb Fez yo muri Maroc, na TP Mazembe yo muri RDC yahesheje igikombe cya shampiyona 2011 na 2012, Super Coupe du Congo ya 2013, CAF Champions League ya 2010 anayigeza ku mukino wa nyuma wa CAF Confederation Cup 2013.

Ni ikipe ifite abakinnyi bahenze cyane kuko nka kapiteni wayo Mohamed Ahmed Bashir, ahembwa ibihumbi 10 by’amadolari buri kwezi.

Al hilal Omdurman yageze kuri iki cyiciro nyuma yo gusezererwa muri CAF Champions League mu ijonjora rya kabiri, aho yasezerewe na Club Africain yo muri Tunisia yari yasezereye APR FC mu ijonjora ry’ibanze.

Iyi kipe niyo izabanza kwakira umukino ubanza tariki 12 Mutarama 2019 naho uwo kwishyura ubere kuri stade Huye tariki 19 Mutarama 2018. Ikipe izakomeza hagati ya Mukura VS na Al hilal Omdurman izahita ibona itike y’amatsinda ya CAF Confederation Cup.