Police FC yatangiye umukino isatira ishaka igitego cyabonetse ku munota wa 22, ku mupira wahinduwe imbere y’izamu, Byiringiro Lague akina n’umutwe afungura amazamu.

Iyi kipe yakomeje gusatira ariko kuboneza mu izamu bikaba ikibazo, mu gihe indi yugariraga bikomeye.

Ku munota wa 37, Byiringiro yazamukanye umupira yihuta awuhindura imbere y’izamu ashaka Emmanuel Okwi ariko umunyezamu wa Rutsiro FC, Itangishatse Jean Paul, asohoka neza awushyira muri koruneri.

Igice cya mbere cyarangiye Police FC yatsinze Rutsiro FC igitego 1-0.

Ikipe ya Polisi y’Igihugu yatangiranye imbaraga igice cya kabiri ikomeza gusatira ariko Byiringiro Lague na Kwitonda Alain Bacca ntibaboneze mu izamu.

Ku munota wa 67, Mugisha Didier yatsinze igitego cya kabiri ariko umusifuzi w’igitambaro agaragaza ko habayeho kurarira.

Iyi kipe yakomeje gusatira, ku munota wa 77, Byiringiro yakorewe ikosa mu rubuga rw’amahina, umusifuzi Uwikunda Samuel atanga penaliti.

Yatsinzwe neza cyane na Byiringiro Lague, Police itangira gushimangira intsinzi.

Rutsiro yazamutse yihuta cyane, ku munota wa 80 yishyura igitego cya mbere, ku ishoti rikomeye ryatewe, umupira ukubita igiti cy’izamu ugwa mu mugongo wa Niyongira Patience, uruhukira mu nshundura.

Mu minota ya nyuma, Rutsiro FC yasatiraga cyane ishaka kwishyura igitego cya kabiri ariko umunyezamu Niyongira akabyitwaramo neza.

Umukino warangiye Police FC yatsinze Rutsiro FC ibitego 2-1 itangirana Shampiyona intsinzi.

Indi mikino yabaye uyu munsi, Etincelles FC yanganyije na Gasogi United ubusa ku busa, Bugesera itsinda Gicumbi igitego 1-0 na Mukura VS itsinda Musanze igitego 1-0.

Saa Kumi n’Ebyiri n’Igice, Kiyovu irakira Rayon Sports kuri Kigali Pelé Stadium.

Amafoto: Umwari Sandrine