Ishyirahamwe ry’umupira w’amaguru muri Afurika (CAF) ryatangaje ko Rayon Sports na APR FC, amakipe azahagararira u Rwanda mu mikino nyafurika azamenya amakipe bazahangana, kuwa Mbere, tariki ya 22 Ukuboza 2014 muri tombola izabera i Cairo mu Misiri.
APR yatwaye igikombe cya shampiyona izakina imikino y’amakipe yabaye aya mbere iwayo, CAF champions league ryegukanywe na ES Sétif yo muri Algeria itsinze Vita Club yo muri Repubulika Iharanira Demokarasi ya Congo (DRC) ibitego 3-3 ku bitego byo hanze.
Mu 2012, APR FC yatsinze Tusker yo muri Kenya mu gice kibanza, isezererwa na Étoile du Sahel yo muri Tuniziya ku bitego 2-3. Rayon Sports yari ihagarariye u Rwanda muri iyi mikino mu 2013 yasezerewe ku gice kibanza na AC Léopards de Dolisie yo muri Congo banganyije ibitego 2-2, ku ibitego byo hanze.
Rayon Sports izahagararira u Rwanda mu mikino y’ayatwaye ibikombe iwabo, CAF Confederation cup kuko APR FC yatwaye n’igikombe cy’Amahoro. Al-Ahly yo mu Misiri niyo ifite igikombe yatsinze Séwé Sport yo muri Cote d’Ivoire.
Rayon Sports iheruka muri iyi mikino mu 2008 yatsinze Harrar Beer yo muri Ethiopia yo isezererwa na Al-Merrikh yo muri Sudani ku bitego 3-0.
Hakurikijwe imyitwwarire y’amakipe hagati ya 2009-2013, bimwe mu bihugu bihagararirwa n’amakipe ane, abiri muri buri mukino. Muri CECAFA, Sudani nicyo gihugu cyonyine gihagararirwa n’amakipe ane.
Kenya izahagararirwa na Gor Mahia (champions league) na Sofapaka (confederation cup), Uganda na KCC FC na URA FC; Tanzania na Azam FC na Young Africans mu gihe u Burundi ari Flambeau de l’Est na LLB Académic zarimo n’umwaka ushize.
Imikino izatangira muri Gashyantare 2015 nyuma y’igikombe kiruta ibindi muri Afurika (CAF Super Cup) uzahuza ES Setif na Al Ahly tariki ya 21 Gashyantare 2015 kuri Stade Mustapha Tchaker mu mujyi wa Blida muri Algeria.
TANGA IGITEKEREZO